Durante conferencia di prensa di AVP, Parlamentario Jeffrey Kelly a papia riba control riba un mucha cu no ta bay scol. A base di esey a puntr’e, ken ta haci e control aki. Por mira cu banda di scol tin hopi mucha cu ta frecuenta scol, pero no ta alumno y cu no por bay scol pa diferente motibo. Sea cu ta social of tin un ke otro problema na cas.
Kelly a splica cu e ta un tarea di mayor y scol pa percura pa e mucha haya e educacion necesario. E tarea principal ta keda na e mayor. Pa loke ta SKOA y e pago di schoolgeld, tin cu menciona cu SKOA semper tabata tin un areglo di pago. Pasobra tin cu corda cu tin mayor cu tin 2, 4 of 5 yiu ta bay scol y ta un peso pisa pa bay paga schoolgeld pa tur e muchanan. No ta mira cu esey mester ta un argumento pa e mucha keda sin bay scol. Tambe e gana ta keda na e mayor cu tin cu motiva su yiu y tin cu obliga su yiu y percura pa e ta na scol manera mester ta.
Ken ta controla esaki?
Tin na scol e director di scol, cu naturalmente ta neem op e presencia di e mucha y si tin un mucha cu ta keda mas cu un siman of 10 dia cas obligacion di e director ta pa meld esaki na Bureau Leerplicht. E ora ey consecuentemente ta tuma contacto cu e mayor y haci un cita na e scol pa e mayor hunto cu e director, hunto cu e mucha sinta cu Bureau Leerplicht y atende e mayornan pa esaki. Awor cu tin mucha cu ta riba caya, segun Kelly, principalmente cu ta un falta di e mayornan den nan responsabilidad pa nan yiunan.
Kelly a splica minister Dowers cu tin varios famia ta cay den circulonan vicioso, caminda cu ta pasa den un situacion, cu tin hobennan cu ta bira mama na edad tempran, nan ta bira wela na edad tempran. Asina e yiunan ta sigui e mesun trayectoria y circulo vicioso y eynan tin cu enfoca. Minister di Husticia a bisa cu ta trahando riba esaki pa bin cu un solucion pa e barionan caminda cu ta haya famianan problematico, hobennan problematico, etc. pa bin cu un solucion mas pronto cu ta posibel pa tur e barionan aki.