Nos ta na comienso di otro aña escolar y Parlamentario Jeffrey Kelly kier a hasi uso di e oportunidad aki pa desea tur alumno, maestro, mayornan y directivanan di scol un aña escolar fructifero. Na tur studiante, corda cu nos ta biba den un pais caminda cu tur mucha por gosa di enseñansa. Haci bon uzo di e previlegio aki pa asina boso por bira ciudadanonan educa cu por aporta na un manera positivo na nos sociedad y na nos pais. Si bo kere den bo mes y duna di bo parti tur cos ta posibel. Na tur maestro, hopi forsa, inteligencia, sabiduria, perseverancia y pasenshi pa asina boso por cumpli cu e responsablidad grandi cu boso tin, cu ta forma y educa nos muchanan. Na tur mayor corda papia cu boso yiu y splicanan pakico e ta asina importante pa nan educa nan mes y corda boso yiunan cu mescos cu na cas y den trafico tin regla, na scol tambe tin regla cu mester cumpli cune. Na tur directiva di scol hopi forsa y pasenshi pa asina motiva nos maestronan y guia boso scol pa na fin di aña boso por mira atras y wak un aña escolar fructifero y exitoso.
Den temporada di vakantie nos por a mira con diferente trabounan a tuma luga pa haci preparacion pa ricibi nos hobennan na inicio di un aña escolar nobo. Parlamentario Kelly ta splica cu e tabatin e placer di admira entre otro Prinses Amalia School cu ta inicia e aña escolar nobo den un edificio completamente renoba. Tin varios scol cu ta den proceso di preparacion pa wordo renoba y nos ta spera cu nan tambe por yega na remarca pronto pa asina alumno y maestronan por haya y duna les den un ambiente agradabel.