CARACAS, Venezuela- E pastoor evangelico Javier Bertucci, un di e candidatonan presidencial di oposicion den eleccionnan di diadomingo na Venezuela, diaranson a cera su campaña cu e promesa di acepta “yudansa humanitario” di Merca den caso cu e gana.
“Mi a pidi yudansa humanitario. Mi a bisa: si bo gana, nan dunabo e poder y den dos siman nos tin e wafnan yen di alimento y remedi”, Bertucci a expresa na su siguidonan den un aglomeracion masivo na Valencia, estado Carabobo, unda cu su iglesia su sede principal den e nacion petrolero.
“Ken kier seis aña mas di miseria?”, el a puntra na e multitud refiriendo di e aspiracion di reeleccion di Maduro. “NO!”, nan a responde na dje.
Venezolanonan ta sufriendo di un crisis economico severo, cu’n hyperinflacion y escasez di alimentonan y remedinan basico. Bertucci, den su actonan di campaña, tabata partiendo sopi na cientos di personanan cu tabata formando filanan.
Henri Falcon ta e rival principal di Maduro den e eleccionnan, pero e pastoor a subi di posicion sorpresivamente den e encuestanan cu rond di 20% di preferencianan entre esunnan cu kier vota, segun encuestadonan priva.
Bertucci ta defini su mes como “independiente”, un atractivo pa su simpatisantenan.
“E no ta wordo arrastra pa politica y lo duna nos un Venezuela nobo”, Wilmer Diaz, un dokter cu a participa den e concentracion final cu’n flanel blanco cu e lema cu cual e lider religioso a postula su mes: “Speransa pa e cambio”.
Falcon a pidi Bertucci pa retira su candidatura pa ricibi su apoyo, pero esaki ta descarta e propuesta.
Ambos a kibra e boycott di e coalicion opositor Mesa di Unidad Democratico (MUD) cu a nenga di presenta candidatonan de un eleccion como “fraudulento” y cu Merca, Union Europeo y varios gobierno di America Latino lo no reconoce.