Ta di lamenta cu den e ultimo 8 añanan no tabatin ningun programa deportivo despues di scol y den bario pa nos hobennan. E falta di atencion aki tabatin su consecuencianan tambe: awe por lesa den medionan di comunicacion cuanto hoben ta cay den droga y KIA su departamento hubenil tin hopi returns, no papia mes di obesidad cu ta hopi alarmante bou nos hobennan.
Responsabilidad primordial di gobierno ta pa haya mas ciudadano posibel den movecion y deporte, esaki lo refleha den menos criminalidad y problema social y directamente lo influencia nos salud general y costo haltisimo di AZV.
Tur bario mester tin e oportunidad pa por recrea pa e motibonan ariba menciona y nos mester bolbe na esaki.
Deporte mester ta accesibel pa tur hoben sin of minimo costo, na unda gobierno lo inverti den programanan cu lo educa y prepara hoben pa cu su futuro.
Minister di Turismo, Salubridad y Deporte Sr. Dangui Oduber sigur den su plan di maneho, tin deporte y movecion den bario como un di su prioridadnan.
Como consehero di Minister di Deporte encarga cu e.o. organisa actividadnan deportivo den bario, lo inicia bou encargo di IBiSA un programa “ Hoben Activo, Hoben Feliz” entrante dialuna 18 di juni specialmente pa muchanan di 9 pa 13 aῆa y lo tuma lugar na Sport Centrum San Nicolas tur dialuna, diaranson y diabierna di 15:00 – 17:00 pm.
Participacion na e programa aki ta completamente gratis.
Mayornan cu ta desea pa nan yiu(nan) participa na e programa aki cu ta encera diferente deporte y movecion por pasa inscribi na Sport Centrum San Nicolas of por yama 5848903.