Den pasado nos a conoce nombernan grandi manera Cliff Henriquez (d.f.m) , Vale Peterson y Curling Ford. Atletanan cu a resalta den ciclismo Arubano. Un deporte cu desde antes tabata wordo practica aki na Aruba pero cu oportunidadnan limita. Despues di nan e deporte di ciclismo a wordo carga door di e.o.Richard Sweetnam (d.f.m.), Gert van Vliet y Lucien Dirksz, cu participacionnan internacional. E ultimo atletanan aki por contabo e tantisimo biaha cu nan a haya nan mes den situacionnan masha dificil y serio pa falta di seguridad riba nos careteranan. Den añanan 80 Sr Rudy Leysner (un ex- trahador na IDEFRE) a lanta e federacion di ciclismo un biaha mas pa por promove e deporte aki. Nos por corda caredanan den “baan” na Lago Sport Park, te hasta cu participantenan internacional e.o. di Trinidad. Competencia di velodrome tabata grandi.
Awe unda nos bira nos ta mira ciudadanonan grandi, chikito y atletanan ta move riba nos careteranan riba nan mountain bike of bais di careda. Un desaroyo sumamante positivo cu lo yuda mehora nos salud. Cu e crecemento drastico aki di ciclismo e problematicanan pa eherce e deporte aki tambe a keda. SEGURIDAD. Nos por a tuma nota cu tin un otro minister, cu no ta di deporte, ta realisando careteranan special pa e deporte di ciclismo, esaki ta di aplaudi. Nos mester regla e seguridad y provee e espacio pa asina e deporte di ciclismo por wordo maximalisa. Ta di spera si cu e minister encarga lo tuma e tempo pa acerca e federacion di Aruba Wieler Bond y delibera riba con miho traha e pista aki y no lague ta simplemente un otro facilidad.
Nos por mira por ehempel riba Linear Park/ Parke Curason cu cana/core no ta bay hunto cu ciclismo riba e mesun caminda, e por crea situacionnan desagradabel y peligroso. Mester planea bon con ta diseña e pista na unda ningun di e dos deportenan aki lo perhudica otro. Tambe tin entendi cu lo regala 1000 bicicleta, ta di spera cu un bes mas uza e experticionan local y e federacion di ciclismo pa evalua e seguridad y e distribucion pa asina yega nan esnan cu menos recurso y miho lo haci uzo di nan. No mester lubida cu mester inverti den seguridad pa e ciclista tambe manera helm. Pa por practica e deporte di ciclismo seguridad riba nos careteranan ta keda e necesidad di mas grandi. Esaki nos mester bira creativo pa asina por percura pa cada ciclista por disfruta den seguridad di nan deporte.
1.Mester bin pa prome un campaña di conscientisacion pa tur nos motociclistanan pa asina nan ta mas conciente cu ken nan ta comparti e careteranan.
2. Mester sondea e posibilidad pa bin cu leynan mas fuerte pa asina proteha e ciclistanan.
3.Facilidadnan actual manera BMX na Parke Curason y San Nicolas mester wordo manteni y busca un forma di traha mas luganan pa por eherce cross Racing (BMX).
4. Por pensa pa bin cu un velodromo, na unda deporte di sprint por wordo practica den un ambiente sigur.
5. Trece bek e ciclovianan pero den diferente bario riba diadomingo.