Recientemente mi por a tuma nota cu un stichting a ricibi material di deporte recondiciona pa asina entrega esaki na scolnan cu no tin. Ta di aplaudi e iniciativa aki priva cu ta mira e necesidad y e negligencia di gobierno anterior pa cu material pa deporte escolar. Trahando cu deporte escolar pa ultimo 35 aña en berdad nos por a mira un negligencia y falta di programanan pa deporte escolar e ultimo 8 añanan. Algun programanan di deporte y movecion na scolnan a wordo para y gobierno anterior a para mayoria entrega di material via IBISA pa e institutonan aki di educacion. Ta di compronde cu esaki a lanta un preocupacion den personanan pa cu e problematica aki cu e consecuencia cu a busca formanan pa asina pa medio di un stichting toch provee materialnan di gym na scolnan. Awe nos tin un gobierno di coalicion bou nos Minister di Deporte nobo , Sr Danqui Oduber, y por mira den su programa di gobernacion e enfasis riba deporte escolar y e prioridad principal. Deporte escolar,facilidadnan existente lo wordo renoba y mantene . Mester centralisa deporte na unda tur partnernan por tin un bista claro na unda e necesidadnan ta mas grandi y con mester bay trata cu esaki. Bou di gobierno anterior a lanta un mini ministerio cu a bay pas departamento di deporte y a haci su mesun cos cu resultado cu a pone , dun’e , traha facilidadnan sin consulta cu e organo di deporte di gobierno. E modus operandus aki mester termina y mester uni tur esfuerso pa asina lanta deporte bek na scolnan manera e tabata ta. Mester bin coordinacion entre departamento di enseñansa y deporte pa coordina y reparti tur material a base di necesidad y prioridad. Den e programacion 2017 pa 2021 unda a programanan di tur partido den coalicion a wordo uni den un Masterplan, scolnan lo haya atencion debido pa cu deporte y lo percura cu tur lo tin e facilidad y material pa asina eleva nos deporte na scolnan.