WILLEMSTAD – Varios parlamentario, en particular esunnan di partido MAN, ta sumamente hostina cu e hecho cu a tuma luga awe den Parlamento na Corsou. Esaki ta pa motibo cu Jacinta Constancia, di partido MFK, un supuesto Cristian naci di nobo, manera e sa bisa, a pasa Giselle McWilliams un bofta den su cara te cu el a hincha su nanishi y a sangr’e, cual potretnan por a wordo mira riba Facebook.
Riba un update cu nos a ricibi, Constancia, riba ordo di fiscal di Ministerio Publico, a drenta den superiodo di “encarcelacion preventivo”, relaciona cu e denuncia di menasa y maltrato. “Encarcelacion preventivo” ta un proceso conforme Codigo di Procedimento Penal, cual ta dura 2×24 ora maximo, pa asina landsrecherche na Corsou por continua cu nan investigacion.
Manera nada no a pasa
Por a mira claramente riba e video cu despues cu Constancia a pasa McWilliams un bofta, y a cana bay manera “nada un pasa”. Y e otro parlamentarionan tabata cana banda di dje tampoco ni a reacciona di e susedido. Si por a mira un presidente di Parlamento Pisas cu tabata riba su punta, mester a cancela e reunion te proximo aviso.
Despues cu Constancia a sali for di Parlamento, el a wordo entrevista pa varios medio di comunicacion, caminda el a declara y “supuestamente” admiti cu el a dal McWilliams y cu finalmente personalmente e lo pidi su disculpa na e parlamentario di MAN.
Di un otro banda, McWilliams, claramente a mustra su disgusto, bisando cu el a wanta e bofta cu honor, pasobra no ta e Constancia a purba di rebaha, sino e pueblo di Corsou cu un acto asina ey.
E tabata un situacion basta bruha cu hasta un di e parlamentarionan a sa di pidi pordon mirando cu ta algo inaceptabel.
Awo durante e proximo dianan, nos lo bay mira e desaroyo di e dilema aki, cual, compara cu parlamento di Aruba nos ta keda chikito para banda di nan. Ta spera cu nos propio parlamentarionan por mira esaki como un ehempel, cu si un lanta contra otro, no ta na beneficio di nos pais. Trahando como un team, semper bo por logra progreso, pero desunion ta causa caos.