BOGOTA, Colombia- Ivan Duque, candidato pa e partido Centro Democratico, diadomingo a wordo eligi presidente di Colombia. Duque a gana e eleccion cu 10.373.080 voto na fabor ( (53.98 %), superando e candidato di Colombia Humana, Gustavo Petro, cu a logra 8.034.189 (41.81 %). Cantidad di votonan nulo tabata di 808.174 (4.2 %).
Despues di cu e resultadonan a bira conoci, Gustavo Petro a reacciona a traves di su cuenta di Twitter: “Cua derota, si ocho miyon Colombiano liber riba pia. Aki no tin derota. Pa awo nos lo no ta den gobierno”.
Di su banda, presidente Juan Manuel Santos a bisa cu el a yama Duque pa dun’e pabien y desea su persona tur clase di éxito. Mi a ofrece tur mi colaboracion pa haci un traspaso di mando di manera ordena y trankil”.
Mas di 36.2 miyon ciudadano tabata tin derecho di voto pa eligi e sucesor di Juan Manuel Santos den Casa de Nariño. Santos lo entrega e cargo dia 7 di augustus proximo.
Ken ta Ivan Duque, e recien eligi presidente di Colombia
Ivan Duque Márquez, e candidato mas hoben cu a participa den e eleccion pa presidente di Colombia. E tin 41 aña y ta naci na Bogota dia 1 di augustus 1976.
E ta abogado na Universidad Sergio Arboleda cu dos titulo master: uno den derecho economico di e American University y otro Ciencia Politico di Georgetown, Merca.
E tabata consultant di e Corporación Andina de Fomento (CAF), di e presidencia di Banco Interamericano de Desarrollo (BID) y asesor di Ministerio de Hacienda.
E tabata Senador y durante cuater aña den Senado e tabata autor di leynan manera e aumento den zwangerschapverlof, leynan pa promocion di economia creativo y proteccion di e cultura nacional, e.o.
El a campaña pa un lucha duro contra di corrupcion y e modificacion di e acuerdo di paz cu FARC, cu e ta considera cu tin fayonan grandi, specialemnte riba temnana manera husticia y reparacion.
Marta Lucía Ramírez lo ta vice-presidente di e pais. E tabata parlamentario (2006-2009); minister di Defensa (2002-2003); minister di Comercio Exterior (1998-2002) y vice -minister di Comercio Exterior (1991-1994).
Retonan pa Duqe
E proximo presidente di Colombia lo tin como reto combati corupcion, e costo di bida halto, insiguridad, e deficiencia den e sector salud y factornan cu por compromete e stabilidad economico, segun encuestanan Gallup (2017) riba e problemanan principal di e pais.
E gobierno actual ta pasando den un situacion delicado relaciona cu e acuerdo di paz firma cu e gueriya di FARC. Un di e lidernan di e recien crea partido politico Fuerza Alternativa Revolucionaria del Comun (FARC) Zeuxis Pausias Hernandez, miho conoci como Jesus Santrich, ta den un proceso hudicial pa supuesto delitonan di narcotrafico cometi despues di e acuerdo.
Vocero di e partido FARC a referi na un eventual extradicion di Santrich pa Merca, cual lo pone e acuerdonan estableci cu gobierno di Santos den peliger.
Santos lo bandona poder mei mei di otro proceso di negociacion cu e autodenomina Ehercito di Liberacion Nacional (ELN) na Havana, Cuba. E grupo paramilitar a wordo señala di comete reclutamientonan forsoso como tambe asesinatonan civil den zonanan selvatico di e pais.
Fuente:NTN24