“Esaki mester ta e miho triunfo den mi carera”, segun Josh Zeid di Israel. Israel (nr. 41 di mundo) ta gana di e anfitrionnan 2-1, den e di cuater edicion di e World Baseball Classic. Esaki tabata e wega inaugural. Esaki ta un triunfo historico, ya cu nunca antes un ekipo Israeli a yega di hunga un wega internacional asina grandi. Door di e derota aki, e ekipo di Zuid- Korea lo mester gana di e ekipo di Reino Hulandes, cu lo hunga mañan 3 or y mei, ora di Aruba, pa asina sigura un luga den e siguiente ronda.
E stadion nobo nobo Gocheok Sky Dome na Seoul, tabata e luga caminda e wega inaugural a wordo hunga, den pool A di e di cuater edicion di World Baseball Classic. Tabata e debut tambe di e ekipo di Israel, cu despues di e fracaso di cuater aña pasa, ta bin gana su weganan contra di Gran Britaniam Brazil y Gran Britania un biaha mas pa asina na ultimo momento, logra clasifica pa e torneo aki.
Como e gran desconoci riba tereno mundial, Israel no a bin cu cualkier ekipo. El a bin cu’n seleccion cu ta consisti di no menos cu 18 hungado di baseball Grandes Ligas. E seleccion ta consisti di hungadonan Americano, pero di descendencia Hudiu.
Apesar di e triunfo, e manager di e ekipo Israeli Jerry Weinster ta keda alerta. “Esaki ta solamente un triunfo, nada mas. Esey kiermen cu mañan nos mester ta cla atrobe pa e siguiente partido. E no ta bay ta facil, sigur no cu un wega yena cu adrenalina y emocionnan”. E siguiente partido di Israel lo ta contra Taiwan.