MANCHESTER, Reino Uni – E movecion terorista Estado Islamico (ISIS), a bisa diaranson di ta responsabel pa e atentado di bom di dialuna anochi na Manchester. Esaki a causa bida di 22 persona y casi 60 herida. Segun polis Britanico, e terorista a rementa su mes cu e bom.
Den un declaracion di e portavoz di ISIS Amaq, no ta papia aki di un atentado suicida. Un “solda” di ISIS a logra pone un bom, segun e declaracion di ISIS.
Mientras tanto, prome minister Theresa May a indica cu polis posiblemente sa ken e causante di e atentado ta, pero no a divulga esaki na publico. E prome minister a bisa den un conferencia di prensa cu ta trata aki di un “hecho enfermo” contra mucha.
E no por a contene facilmente su rabia. “E atentado na Manchester ta e atake mas terorifico den historia di e pais. E causante a detona cu sanger friu cu e meta pa reclama mas tanto victima hoben cu ta posibel.”
E prome minister a bisa cu e causante tabata tin un ID cun’e y cu su identidad ta conoci na autoridad. Su nomber ainda sinembargo, no por a wordo confirma.
May lo biaha mas laat durante dia na Manchester caminda cu e lo topa cu e victimanan, agentenan policial y trahadonan di rescate. Despues e lo bay bek London pa un di dos reunion cu e team di crisis.
Fuente: www.rtlnieuws.nl y www.telegraaf.nl