COLUMBUS, Ohio – E organisacion terorista Estado Islamico (ISIS) a tuma e responsabilidad di e atentado di e refugiado Somali di 18 aña riba un campus Universitario na Ohio. Den un comunicado via nan agencia di noticia Amaq ta yama Abdul Razak Ali Artan “un solda di e califato,” segun e agencia di noticia Reuters.
Durante e atentado, 11 persona a wordo herida, e causante mes a wordo mata door di polis. Prome Artan a dal hende cu auto, despues el a sali afo y a cuminsa hinca hende. Polis no a bin cu ningun informacion riba e posibel motibo di e causante.
Fuentenan ta bisa e agencia di noticia AP cu Artan a pone postnan riba Facebook caminda e ta reacciona riba con Merca ta anda cu e mundo Musulman. “Si boso no kier ningun atakenan “lone wolf” Musulman, boso mester cera paz,” lo tabata un di e su postnan. El a adverti Merca pa sali for di e mundo Musulman, AP a bisa.
Strategia
Artan a biba di 2007 te cu 2014 na Pakistan. Despues el a wordo permiti pa drenta Merca. Su nomber no tabata conoci na FBI. E Somali mes tabata studiante na Ohio State University na Columbus.
Ta hopi confuso si Artan realmente tabata forma parti di ISIS. Den pasado den e strategia di e grupo di teror, nan ta tabata tuma e responsabilidad di cierto atakenan. ISIS ta pidi simpatisantenan pa haci cierto atakenan riba propio iniciativa. Omar Mateen, e causante di e tiroteo na e club homosexual Pulse, a hura lealtad na ISIS, despues di esey ISIS a tuma full responsabilidad riba esaki. Tambe e atacantenan di e baño di sanger na San Bernardino, a hura lealtad na ISIS.
Fuente: NRC