E aña aki poeta Angelle Stamper a debuta cu su buki di poesia “Cicatriz di Mirada” for di Hulanda. Actualmente Angelle ta na Aruba pa presentacion di su buki, cual lo tuma lugar dia 3 di Januari 2017 na Renaissance Marketplace cuminsando pa 7or di anochi. Durante e anochi Angelle lo presenta su obra atrabes di declamacion di varios poema.
Cicatriz di Mirada ta un album di poesia conteniendo poema na Papiamento, Ingles, & Hulandes acompaña pa potretnan saca na Aruba saca pa Angelle su mes persona. Na varios ocasion Angelle a declama poesia na diferente evento cultural, exposicion di arte y actividad formal tanto na Aruba y den exterior. Angelle a participa diferente biaha na e compentencia literario “Arte di Palabra” na Aruba y na Corsou. Na diferente ocasion a bay cu premio di prome y segundo luga pa su poemanan “Garnachi di Speransa” y “Bo no mag di bay”. Na 2011 Angelle tabata un di e 25 hobennan cu haya reconocemento en conexion cu celebracion di 25 aña di Status Aparte, pa medio di exposicion Aruba Dushi Tera “Chikito y simpel bo por ta pero si respeta”. E mesun aña Angelle a presenta su poema “Freedom within” na develo di estatua di Anne Frank den Wilhelmina Park.
Pueblo di Aruba ta keda cariñosamente invita pa bin presencia e presentacion di “Cicatriz di Mirada”. Despues di e presentacion lo tin un sesion di firma. Entrada pa e evento ta gratis. Pa mas informacion por tuma contacto via 6624003 of por email na [email protected].