E akshonnan na Sint Maarten den kuadroi di e investigashon Emerald ku a inisiá djaluna 28 novèmber 2016, ta kontinuá awe djamars 29 di novèmber. E tim pa kombatí kriminalidat ku ta mina (TBO) di “Recherche Samenwerkingsteam” (RST) den koperashon ku Landsrecherche St. Maarten i bou di guia di un hues komisario a kontinuá awe ku mas entrada hudisial.
Banda di e entradanan hudisial a konfiská tambe te ainda sinku outo. Danki na koperashon estrecho ku outoridatnan di parti Franses di St. Maarten a konfiská alabes un yate.
E sospechoso O.A. (35) prosedente di St. Maarten a keda arestá djaluna mainta i entretantu ta enkarselá. E ta sospechá di froude ku impuesto, falsifikashon di dokumento, labamentu di plaka i poseshon ilegal di un arma di kandela. Awe hues komisario a husga ku tur aspekto entorno e aresto i enkarselashon di e sospechoso a bai konforme lei.
Ora ku tur akshon terminá lo duna un “update” final.
E investigashon Emerald a inisiá na aprel 2016 abase di artíkulonan den korant i preguntanan den Parlamento riba un kontrato entre e kompania di seguridat di e sospechoso i e outoridat di haf di Sint Maarten. Durante di e investigashon aki a sospechonan di froude ku impuesto, falsifikashon di dokumento i labamentu di plaka a lanta.
E investigashon aki ta parti di esfuersonan intensivo i konhunto pa kombatí froude i korupshon ku ta krusa frontera, esta kriminalidat ku ta mina. Kriminalidat ku ta mina manera entre otro korupshon i labamentu di plaka ta forma un problema serio pa seguridat i ekonomia di e pais- i islanan den Reino Hulandes ku ta keda den Karibe.
E tim pa komatí kriminalidat ku ta mina (TBO) di RST huntu ku ofisinanan di Landsrecherche di Kòrsou i Sint Maarten i Ministerio Públiko a uni forsa den esfuersonan pa kombatí kriminalidat ku ta mina. Demandanan pa konfiská benefisionan optené for di aktonan kriminal ta kuadra den e maneho nobo di Ministerio Públiko. Den futuro lo somté mas di e tipo di demandanan aki.