Inversionistanan ta purbando di haci ekilibrio pa otro siman

0

INGLATERA – Inversionistanan global lo haci un ekilibrio otro siman entre e datonan moderadamente positivo y di e mayor economianan di mundo, di un banda y di otro banda, e diferente temornan politico, enfocando ademas den e encuentro mensual di e Banco Central Europeo (BCE) y e eleccionnan na Gran Britania.
E Bolsa di New York a cuminsa Juni prolongando su racha di halsamento, ya cu e indicadornan cu ta apunta na un economia Mericano saludabel a compensa cu crecemento di duda riba e capacidad di e presidente Donald Trump pa impulsa su agenda ante e plemica genera pa e supuesto lasonan cu Rusia.
E mercadonan ta susceptibel (…) na e riesgo politico pero den termino di economia y di e ganashinan empresarial, nos ta unda e inversionistanan ta sinti nan mes comodo,” Peter Kenny, estatega di mercadonan di Global Markets Advisory Group na New York, a bisa.
Den e zona Euro, BCE lo mantene e expansion monetario basa riba compranan di activo pa 60 mil miyon di Euro den su proximo reunion, di acuerdo cu un sondeo di Reuters. En todo caso, posiblemente ta ofrece un evaluacion algo mas solido cu e economia den blok, aunke sin modifica su panorama.
Otro factor cu a alenta e mercado ta e reduccion di e expectativa di un salida Britanica impetuoso di e Union Europeo (UE), pues e prome minister Theresa May, na fabor di e “Brexit”, lo haya un triunfo apenas hopi ahusta den eleccion, segun e ultimo encuestanan.
Na Merca, politica ta sigui den bista di inversionistanan, dado cu e exdirector di FBI James Comey lo testifica dilanti un comision di e Senado como parti di un investigacion riba e supuesto colusion di Moscu cu e campaña di Trump pa yega na Cas Blanco.
Den contraste cu e bon momento den economianan mas desaroya, e accionnan di China y petroleo a duna perdida na financistanan den simannan reciente. Ambos ta relaciona cu e desempeño dui e economia di e gigante Asiatico, cu lo publica otro siman datonan di su inflacion na Mei.
Otro punto di interes den e agenda cercano na e Organisacion pa e Cooperacion y Desaroyo Economico (OCDE) cu lo celebra un serie di encuentro na su sede na Paris pa aborda cuestionnan manera resurgimento di populismo y e cambio rapido tecnologico.
Fuente: www.reuters.com