Diahuebs atardi a tuma luga e registracion pa e campeonato nacional di Himno y Bandera organisa pa Aruba Taekwondo Bond. E campeonato ta diasabra awor den Centro di Bario Brazil y lo cuminsa pa 10’or di mainta.
Un total di seis scol di Taekwondo a registra nan atletanan pa asina nan por competi diasabra awo den Centro di Bario Brazil. E scolnan a entrega nan lista di 7 atleta pa bringa pa e Best Team Cup. Mester bisa si, cu ta bay tin masha hopi infantil mes cu lo bay subi e arena di combate pa prome biaha. Esaki ta e bon caminda di cuminsa cu un carera den cualkier deporte, for di chikito.
Grand Master Chaco Jose Cornelio a bisa caba cu lo haci uso di e reglamentonan nobo na e campeonato di Himno y Bandera aki, pa asina e atletanan cuminsa adapta nan mes na nan nacionalmente y pa ora nan biaha bay un campeonato internacional pa nan ta cla y bon prepara pa esaki.