Aruba a adopta un vision di largo plazo cu ta implica un futuro sostenibel y a pone hopi atencion ariba innovacion y diversificacion pa fortalese competividad y ‘veerkracht’ di nos economia. Den e etorno dinamico di siglo XXI, e desaroyo economico sostenibel di Aruba por wordo logra pa medio di un spirito fuerte empresarial, oportunidadnan di industria nobo, mehoracion di productividad empresarial y oportunidadnan pa inversionnan nobo.
Gabinete Mike Eman I y II durante ultimo 8 ana a duna prioridad na mehoracion di e ‘Producto Aruba’, atrabes di inciativanan manera ‘Bo Aruba’, cual ta e plan extenso di renovacion di infrastructura urbano cu ta forma e curason di e programa di desaroyo economico. ‘Bo Aruba’ ta enfoca ariba mehoracion di infrastructura, barrionan, scolnan, edificionan gubernamental, areanan public y e dos areanan urbano principal esta Oranjestad y San Nicolas. Awe, Aruba por ta orguyoso pa mustra un lista di proyectonan finalisa exitosamente y otronan cu ta den ultimo fase pa finalisa cu lo transforma Aruba den un modelo excelente di desaroyo economico sostenibel. Tur esakinan ta forma un base sumamente fuerte pa bai e sigiente nivel.
E top 5 areanan pa desaroyo economico ta, 1) e proyecto infrastructural cu ta encera Green Corridor y Watty Vos Boulevard, 2) e area na waf di Oranjestad, 3) e area rond di refineria cu ta den proceso di rehabilitacion, 4) e area rond di e waf di Barcadera y por ultimo e area rond di hospital nobo.
Mientras cu Gobierno di Aruba ta sigui duna gran importancia na diversificacion di Aruba su economia, a identifica sectornan strategico, e asina jama ‘Top Sectors’ cualnan ta permiti Aruba probecha di su ubicacion central, como tambe brinda mas oportunidad pa empleo pa nos hendenan. Nos ta referi na e sector di Technologia Berde, Logistica, Exportacion di Conocemento y e Industria Creativo.
E sector di industria creativo di Aruba ta basa su mes riba e tradicionnan fuerte di nos sector cultural y ta provee un scala amplio di oportunidadnan pa integracion di tecnologia innovativo cu concepto y diseñonan nobo. E industria creativo tin un rol grandi den desaroyo di e economia di conocemento na Aruba y door di stimula ‘entrepreneurship’ local.
Despues di a traha cu diferente artistanan tanto internacional como local y combersando cu diferente creativonan mi a wak y experencia e importancia di ‘Industria Creativo’ como un base pa desaroyo y diversificacion di economia pa nos isla. Creatividad y Cultura ta hungando un rol central mundialmente pa bin cu ideanan nobo, innovando asina cada biaha e relacion y systemanan pa stimula desaroyo riba diferente terenonan.
Na 2013 mi a dicidi pa cuminsa cu un iniciativa propio pa habri un Centro Creativo aki na Aruba, mi a yama esaki “Beam” y for di aña pasa ta situa na Steenweg 17 na Oranjestad den un edificion monumental. Como plataforma creativo nos ta stimula y duna espacio na creativonan riba diferente tereno pa duna workshops, business advice y ta traha cu plataforma creativonan for di Hulanda y ta trahando di serca cu Kamer Van Koophandel pa cuminsa cu un programa di incubator pa stimula young entrepreneurs y start ups.
Cultura ta e manera con nos como persona bibando hunto den un comunidad ta expresa nos mes y nos abilidad y pues cultura mester ta central y integral pa por yega na un desaroyo sostenibel.
Mi ta kere cu nos mester integra e experencia di cultura pa nos hendenan y stimula asina mas identidad, autenticidad y cultural entrepreneurs den nos comunidad.
Nos tin un rikesa na un cultura hopi diverso cu ta crea hopi posibilidadnan pa nos sinja for di otro y crea espacionan pa cada un di nos por tin posibilidad di progresa den nos comunidad.
Esaki lo trece cu ne tambe un experencia cultural mas fuerte pa nos hendenan y nos bishitantenan cu un stimulacion pa nos sector Cultural y creativo.
Nos isla ta un luga vibrante y fascinante. Nos mester haci un esfuerso pa atrae turistanan cu ta interesa den nos raiznan cultural, historico , ecologico y culinario. Tin un mercado grandi pa ‘turismo berde’ cu por habri oportunidadnan pa excursionnan ecologico riba nos isla. Nos mester apoya nos fundacionnan cultural y culinario manera carnaval y promove nos tradicionnan culinario unico (un mescla di cuminda Hulandes, Latino, Asiatico y Indjan). Un strategia di mercadeo efectivo por brand Aruba cu mas cu solamente beachnan y atrae turistanan cu ta mas interesa den nos experiencianan local, treciendo asina mas placa aden pa nos barionan.
Laga nos mercadea Aruba como un destinacion di experiencia. Nos tin tur cos: un variacion excitante di cuminda, un historia cultural diverso y un ambiente ecologico unico pa explora.