Diabierna atardi, Central di Polis ta manda patruya na e adres Bubali 16-A. Segun e melding, bisiñanan pa algun tempo caba no ta wak niun hende ta drenta ni sali for di e cas en cuestion.
Na e cas tabata tin 5 cacho cual bisiñanan a ripara cu a bira mas flaco.
Na yegada di e patruya, nan a bin haya e heki dilanti na yabi. E oficialnan di polis a bula cura pa asina inspecciona e cas mas di cerca. Polis a bati algun biaha riba e porta pero niun hende no a habri. Despues cu polisnan a ripara cu e porta patras tabata habri, nan a drenta pa asina tira un bista paden pero no a topa cu nada sospechoso.Pero si a ripara cu en berdad e cachonan tabata den mal estado. Instancianan concerni a wordo poni na altura di e situacion.
Alrededor di 11′ or y 10 di anochi durante un control di rutina, polisnan a bin topa cu un auto marca Daihatsu, model Cuore, color cora y nr. A- 36942. E chauffeur. M.M.P., a declara cu el a bin trece cuminda pa e cachonan. Tambe el a bisa cu e doño di e cas, Q ta na Hulanda, y cu e doño lo regresa Aruba dia 29 di Januari. Instancianan concerni a bin busca e cachonan ya cu nan no por a keda mas na e cas den e condicionnan cu nan tabata ta.