Instalacion di coriente den edificio comercial y particular, tambe instalacion di gas den edificio comercial ta suheto na exigencianan stipula den ordenansa of decretonan di pais Aruba.
Pa por haci un instalacion di coriente of gas un persona mester ta reconoci pa gobierno di Aruba pa haci tal trabao.
Pa yega na reconocemento, e ordenansa, decreto of decision ministerial ta duna e exigencianan minimo pa loke ta trata educacion y experiencia den e ramo di trabaonan aki.
Persona reconoci, tambe yama instalador reconoci, ta e unico cu ta autoriza pa haci of laga keur un instalacion di coriente of di gas.
Tur instalador reconoci, tanto di coriente y di gas, ta haya un decreto ministerial cu ta autoris’e pa haci e trabao y tin un badge otorga door di DTI cu nan mester identifica nan mes cune.
E instaladornan di coriente y di gas ta reconoci a base personal y ta nan mes mester haci e trabao y laga keur esaki door di DTI.
E instalador di coriente por laga otro persona haci e trabao con tal cu e persona aki ta debidamente prepara pa esaki y e instalador reconoci mester tene un supervision continuo riba e calidad di e instalacion, debi cu e instalador reconoci ta keda responsabel pa e instalacion pa un aña pa loke ta trata su calidad y bon funcionamento. Tin instalador cu ta reconoci pa traha pa un empresa specifico y no riba su mes, den e caso aki e empresa ta keda responsabel pa e instalacion.
E instalador di gas reconoci no por laga un otro persona haci e trabao; e decreto ta determina cu ta e instalador di gas personalmente mester haci e instalacion di gas.
Tanto e instalacion di coriente y di gas mester ta instala segun norma of procedura estricto pa loke ta trata e material cu por uza y e sistema di instala. Door di esaki por bisa cu na Aruba nos tin instalacion di coriente y gas di calidad halto y sigur.
Ultimo tempo por mira den corantnan local cu tin persona ta ofrece pa haci instalacion di coriente of gas. E persona cu ta ofrece e servicio aki no ta indica cu e ta un instalador reconoci p’esey DTI ta recomenda, si bo kier haci uzo di e servicio di e persona aki of di cualkier otro persona cu ofrece e servicio aki, pa laga e persona demostra si e ta reconoci pa haci e trabaonan aki. Pues lag’e mustra su badge di DTI. Esaki ta pa garantisa cu bo lo haya un instalacion bon haci segun norma of procedura acepta pa DTI y cu ta sigur den su uzo.
Un instalacion di coriente of gas cu no ta haci segun norma of procedura acepta pa DTI ta trece gasto adicional cune, te hasta cu mester haci ful e instalacion di nobo; y ta casonan cu a sosode caba. Y den caso extremo esaki por trece bida di hende na peliger. Tur ampliacion of modificacion riba un instalacion di coriente of di gas mester wordo haci tambe pa un instalador reconoci cu mester percura pa laga keur esaki door di DTI prome cu pone bek den funcion.
DTI ta urgi tur persona cu ta construyendo of tin plannan pa construi un edificio of cu tin un edificio caba pero tin necesidad di amplia of haci cambio den e instalacion di coriente y/of gas pa tuma contacto cu un instalado reconoci tempran pa por haya e conseho necesario con ta e mihor forma pa haci e instalacion rekeri y unda por baha den e gastonan di e instalacion of di e consumo sea di coriente of gas. E instalador reconoci conoce e exigencianan di DTI y por haci un calculacion adelanta di costo envolvi y duna un oferta pa su trabao.
DTI tin lista di e personanan reconoci tanto pa haci instalacion di coriente of di gas y ta suministra esaki riba peticion na tur interesado. Pa mas informacion por tuma contacto cu e seccion Elektrokeuring, pa asuntonan di coriente, of e seccion Stoomwezen, pa asuntonan di gas.