InselAir ta prepará pa futuro

0

WILLEMSTAD – Debí na kambio riba merkado InselAir ta hañ’é obligá di hasi algun adaptashon den su organisashon i den su operashon. E kambionan aki ta nesesario pa mantené un organisashon saludabel pa asina por kumpli ku e ròl importante ku InselAir tin, entre otro: den ekonomia di Kòrsou en general, tresiendo tur aña míles di turista na e islanan ABC, InselAir a duna trabou na sentenáres di persona direkto i tambe míles indirekto i e ta e kompania di aviashon prinsipal entre e islanan den Reino. Ku e inisiativanan, ku ta wordu deskribí mas abou, InselAir tin fe i konfiansa den futuro di su organisashon i su abilidat pa keda un di e dunadó di trabou mas grandi na Kòrsou.

Kon lo kompensá e redukshon di e merkado Venezolano.

Último lunanan InselAir a logra kompensá pa gran parti i ku éksito, e bahada di buelo pa i for di Venezuela (di 35% pa 4%) agregando ruta i destinashon nobo, manera, Port of Spain, Barranquilla, Georgetown, Manaus, Havana, San Juan i Quito.

Adishonalmente InselAir a subi frekuensha di buelo pa Paramaribo, Port au Prince i Santo Domingo.“A resultá di ta un reto pa kompensá e pèrdida aki i nos a realisá ku nos mester aseptá i restrukturá nos organisashon rondó di e realidat nobo aki” asina Albert Kluyver, CEO di InselAir a bisa. Sr. Kluyver a sigui bisa ku pa e parti di nos operashon ku nos no por kompensá nos lo mester baha gastunan. Pa e motibu aki nos a evaluá tur parti den nos organisashon, manera finansa, operashonal, komersial, asuntunan general i tambe mantenshon pa asina por realisá bahada di gastu. Nos a revisá nos ret di ruta i basa riba esei e otro inisiativa importante ta pa redusí nos operashon di buelo.

Kiko esaki ta nifiká?

Redusiendo aktividatnan operashonal ta nifiká ku InselAir mester redusí su gastunan i tambe e kantidat di empleado ku tabata nesesario den e operashon anterior. Un operashon mas chikí lo wordu manehá dor di un grupo di empleado mas chikí. Pa logra esaki InselAir lo reorganisá su forsa laboral dor di 1. Kombiná posishonnan, 2. Eliminá departamentu i /òf 3. Kambia empleado di departamentu. Empleado ku no por wordu garantisá un posishon den e struktura nobo di e kompania, lamentablemente lo mester terminá e akuerdo di empleo ku nan. Lo sostené e grupo aki den búskeda di un posishon den otro organisashon.

Bista riba 2017

Ta hopi lamentabel, pero e pasonan ariba menshoná ta nesesario pa sigurá InselAir su posishon den “Pan American skies” i pa krea un organisashon stabil i finansieramente saludabel i sólido pa su aktornan, inkluyendo nos empleadonan dediká ku lo keda den e organisashon kual ta kla pa futuro. Debí na akshonnan implementá resientemente, InselAir ya kaba ta eksperensia mehoransa den su “on-time performance” di 60% pa 72% i ta bringando pa yega na 85% bek den futuro serkano. Ku buelo for di Sur Amérika pa Karibe, InselAir lo permanesé e di 3 kompania di aviashon mas grandi den region, sirbiendo 22 destinashon i 140 ruta ku un flota di 14 avion. Pa 2017 InselAir lo renobá su flota di MD i Fokker.