Temporada di aña escolar ta yegando su final un biaha mas Arubaanse Sport Unie ASU en conhunto cu Instituto Biba Saludabel y Activo, IBiSA tin un programa di vacacion cla pa ofrece na nos muchanan. Ta bon pa mayornan planea y regla for di tempran e vakantie di nan yiunan. ‘Ban Move Camp’ ta un actividad cu ta wordo organisa anualmente door di Ministerio di Deporte, ASU y IBiSA cu sosten di Fundacion Lotto pa Deporte
Ban Move Camp ta wordo organisa den luna di Juli y cada siman ta na un localidad diferente. E aña aki e prome siman dia 10 te cu 14 di Juli 2017 e camp ta na Centro Deportivo Betico Croes na Sta. Cruz e di dos siman dia 17 te cu 21 di Juli 2017 ta sigui na Joe Laveist Sport Park na San Nicolas y e ultimo siman di 24 te cu 28 di Juli 2017 e ta tuma lugar na Compleho Deportivo Frans Figaroa na Noord
Inscripcion ta habri dia 19 di Juni 2017 na tres localidad. Esaki ta posibel for di 8’or di mainta te cu 12’or di merdia y for di 1’or di merdia te cu 4’or di atardi, na oficina principal di IBiSA situa na Frankrijkstraat na Arubaanse Sport Unie (ASU) na Centro Deportivo Betico Croes y na IBiSA Sport Centrum na San Nicolas
Ta corda mayornan cu tin solamente 100 cupo disponibel den cada camp. Na momento cu yega e cantidad di cupo, no ta tuma mas inscripcion. Alabes ta informa na mayornan, cu no ta tuma inscripcion mas riba e dia di camp ta cuminsa mes. Pesey ta pidi mayornan pa acudi tempran pa sigura e cupo di bo yiu. Ta exigi pa e muchanan bin cu keds y short, pa nan desayuna prome cu nan bin mainta.
Informacion di ‘Ban Move camp’:
E orario di e ‘vakantie camp’ ta for di 8’or di mainta pa 1’or di merdia, pa muchanan di 6 pa 14 aña cu ta bayendo Scol Basico. Durante e camp, e muchanan ta haya un programa organisa y varia cu ta encera ‘Deporte y Movecion’ tur dia.
Rekisito na momento di inscribi:
Un mayor of voogd di e mucha mester pasa personalmente pa inscribi y mester trece e carchi di AZV(valido) di e mucha pa por registra su number di AZV pa e wordo sigura. Na momento di inscripcion ta haci e pago tambe. E costo di participacion na e ‘vakantie camp’ ta Afl. 25,- pa 1 yiu. Ora ta 2 yiu esaki ta Afl. 40,- pa nan 2. Y ora ta 3 yiu e participacion ta bira Afl. 60,- pa nan 3. E costo di participacion ta pa siman, y e ta encera cu e mucha ta ricibi un T-shirt y diariamente tambe 1 sandwich, 1 juice y 1 fruta.
Pa mas informacion por tuma contacto cu oficina di IBiSA 582 4987 of ASU 585 4071