KAZAJISTAN – “Poligono” di Kazajistan ta un luga cu un pasado aterador: eynan a yega di detona un promedio di 10 bom atomico pa aña, entre 1949 y 1989. Y e consecuencianan por wordo sinti te dia di awe.
Den pleno Guera Friu, e tabata e principal instalacion di experimentonan atomico di e extinto Union di e Republica Socialista Sovietica (URSS) y e mayor di mundo.
Gobierno di URSS a detona eynan 456 artefacto nuclear.
E Poligono, cua nomber oficial tabata Sitio di Prueba di Semipalantinsk – tabata mesun grandi cu Belgica of e estado di Maryland, na Merca.
Un dato curioso ta cu e ciudad di Kurchatov, desde unda tabata coordina e pruebanan di Semipalatinsk, a ricibi e nomber di e fisico Ruso y e lider di e programa atomico Sovietico, Igor Kurchatov.
E zona a wordo eligi pa su geografia, pa su relativa cercania na Moscu compara cu Siberia y, pasobra segun e director di polis secreto y mas despues hefe di e proyecto Sovietico pa e bom atomico, Lavrenti Beria, tabata un luga practicamente deshabita.
Precisamente pa e duresa di e tereno, tsar Nicolas 1 a destera e escritor disidente Ruso Fiodor Dostoyeviski pa Semipalatinsk, na 1854.
Fuente: BBC Mundo