Sr. Frances Ras, Manager di Asuntonan Tecnico di WEB, a papia tocante situacion actual relaciona cu e huma cu ta causando un molester riba waf di Barcadera y e solucionnan cu tin pa alivia esaki.
Sr. Ras ta splica cu tin ingenieronan structural civil biniendo Aruba den e proximo dianan pa determina si ta posibel pa reduci e sulfer y hisa e staaknan un tiki mas p’asina por alivia e huma cu ta baha dor di e biento. Tambe tin e parti di e stroomnan cu tin durante e proceso di combustion di e boiler, caminda e flow gas ta sali den un cierto velocidad. Lo haci un investigacion pa wak si por laga e flow gas sali cu un velocidad mas halto y asina e ta pasa net over di e area di ASTEC y asina limita e exposure di gasnan aki na e trahadornan di Barcadera.
Segun sr. Ras, esaki ta e prome biaha cu a haya keho riba molesternan aki. Durante e construccion di e waf na Barcadera, nunca a ricibi ningun keho. Ta te cu aña pasa 2017 cu a cuminsa bin dilanti cu kehonan di e huma cu tambe ta wordo causa pa e cambio di biento. Sr. Ras a sigura cu ta acelerando e proceso pa purba alivia e situacion.