Contrario na loke hopi ta custumbra cun’e, cu ora di formacion di gobierno, despues cu gobernador nombra un informador, esaki ta sinta cu partidonan cu ta desea di forma gobierno hunto. Pero e biaha aki, informador a reuni tambe cu e partido cu for di un comienso a bisa di lo bay den oposicion. Kisas ta buscando di forma un gobierno di un base hopi mas amplio?
Mester recorda cu despues di eleccion, lider di partido AVP a bisa cu nan no ta desea di sinta cu niun partido, y cu nan lo bay den oposicion. Den e prome ronda di combersacion, informador a sinta na mesa cu e partidonan MEP, POR y RED, cual ta e tresnan cu ta interesa di forma un gobierno di coalicion, cu base amplio.
Pero grandi tabata e sorpresa, ora cu a haya e informacion cu diamars merdia, na e mesun luga di semper, informador mr. Arie Swaen a reuni cu tres miembro c.q. minister cu ta miembronan di partido AVP. El a reuni cu mr. Arthur Dowers, Ing. Mike de Meza y Sr. Benny Sevinger. Esaki sigur sigur a hala atencion di hopi hende pa motibonan ya conoci. E gran ausente den e reunion aki tabata sigur sigur e lider di e partido mes, prome minister mr. Mike Eman. Partido AVP lo a cambia di idea toch?
Mr. Mike Eman a anuncia cu e lo retira di politica activo, y cu e lo pasa e liderasgo di partido over pa un otro persona, cu e meta di rehubenece e partido. Hopi ta e speculacionnan cu tin rond di esaki, pero manera ya bisa ta keda speculacion.
A tuma contacto cu oficina di gobernador, caminda cu nos a wordo informa cu ta informador ta esun cu ta dicidi cu ken e ta sinta na mesa pa despues informa gobernador ariba e ultimo acontecimentonan.
Diaranson dia 4 di October den oranan di mainta y merdia, lo sigui cu e di dos parti di reunionnan cu e partidonan MEP, POR y RED.