PALMA DE MALLORCA, Spaña – Cristina de Borbon, ruman muhe di e rey di Spaña, Felipe VI, a wordo absolvi e diabierna aki di fraude fiscal, pero su casa Iñaki Urdangarin, a wordo condena na 6 aña y tres luna di prizon pa su malversacionnan, e tribunal a informa.
Infanta Cirstina, di 51 aña, a wordo husga como complice den delitonan di fraude fiscal vincula na malversacion di 6 miyon di Euro publico, atribui na su casa ora cu e tabata presidi e fundacion Instituto Noos.
E tribunal di Palma de Mallorca, den e islanan Baleares, a exculpa finalmente e infanta: “nos tin cu absolve y nos lo absolve doña Cristina Federica de Borbon y Grecia di e delitonan contra belasting publico,” caminda cu ta señala e fayo emiti ocho luna despues cu e huicio a wordo mira pa e sentencia.
Ainda asina, e tin cu paga un multa di 265 mil euro, monto ya restitui durante e procedimento pa su responsabilidad civil como beneficiario di e ganashinan obteni pa su casa.
For di e Cas Real, cu a aparta e infanta di e actonan oficial despues cu e escandalonan a sali na cla, un vocero a limita na expresa “e maximo respet na e independencia di e poder hudicial.”
Urdangarin a core menos suerte: e tribunal a conden’e na seis aña y tres luna di prizon y paga un multa di mas di 512 mil euro.
Ta acus’e di a malversa hunto cu un antiguo socio miyones di euro entre 2004 y 2006 atrabes di contratonan publico firma entre e Instituto Noos y e gobiernonan regional di Baleares y Valencia, dirigi e tempo ey pa e Partido Popular di e hefe di Gobierno, Mariano Rajoy.
E magistradonan a consider’e culpabel di malversacion, prevaricacion, fraude na administracion, trafico di influencia y fraude fiscal.
Fuente: Globovision