Na honor di e celebracion di e 40 aniversario di Timeshare na Aruba, Aruba Timeshare Association (ATSA) a laga traha un rapport, cu data cu a wordo colecta den cabamento di 2017, pa asina duna un bista di e industria di timeshare riba nos isla. E rapport a wordo traha den colaboracion cu Aruba Tourism Authority (ATA), y a wordo prepara pa Universidad di Aruba (UA). Lo siguiente ta e ultimo di e seis articulonan, resumiendo e estudio.
E siguiente puntonan ta recomendacionnan pa e industria di timeshare basa riba e estudio di 2017 cu Universidad di Aruba, Aruba Timeshare Association (ATSA) y e datonan colecta pa Aruba Tourism Authority (ATA).
- Traha hunto cu otro proveedornan den hospitalidad y turismo pa agrega balor na e producto timeshare actual na Aruba – debi na e edad di e industria di timeshare na Aruba, e ta conoci, pero e por ta perdiendo su briyo bao e populacion jong y bao esunnan mas grandi.
- Enfoca riba otro ubicacionnan pa e propietarionan di timeshare, e porcentahe di posesion di Estados Unidos ta hopi halto (den e encuesta di e studiantenan, e propietarionan di Estados Unidos ta representa mas di 79% di e encuestadonan).
- Promove e consumidornan di “lifestyle” y “experience-based” cu ta busca experiencianan unico durante vakantie y cu ta gusta promove nan mes di tin un cierto tipo di estilo di bida. E gran mayoria di e propietarionan di timeshare tin entrada halto y porta nan lo kier tin mas experiencianan luhoso durante nan vakantie.
- Prepara e producto timeshare pa satisface e necesidadnan di e clientenan mas jong, por ehempel Millennials, y hasi mas uzo di rednan social, gaming, actividadnan di grupo y promocion.
- Mercadea un tour/pakete pa pasaheronan di barco ora nan desembarca pa nan por conoce e producto di timeshare akinan di un manera mas enfoka.
- Desaroya productonan pa e clientenan mas jong y cu entrada mas halto, ya cu nan ta mas probabel pa cumpra un timeshare y gasta placa mientras nan ta akinan. Mas jong – timeshare mes, deporte acuatico; mas entrada – cuminda y bebida luhoso of exclusivo, shopping y opcionnan pa gamble.
- Crea oportunidadnan pa balor comparti, por ehempel, asocia cu empresarionan di retail, hospitalidad y otro entidadnan di turismo pa ofrece paketenan mas exclusivo.
- Mas bishita ta aumenta e satisfaccion, intencionnan di comportacion; e bishitantenan di mas edad ta menos satisfecho y tin percepcionnan menos positivo encuanto nan experiencia compara cu e bishitantenan mas jong – aumenta e cantidad di bishita mediante beneficionan pa si nan bolbe bin Aruba, punch cards, descuento den algun area, y mercadea actividadnan unico pa e bishitantenan di mas edad pa aumenta nan satisfaccion y recomendacion door di “word-of-mouth”.
- Aumenta e variedad di cosnan pa hasi riba nos isla, por ehempel experiencianan unico manera come cu localnan of coneccionnan cu famianan di Aruba, etc.
- E hende muher lo recomenda Aruba mas liher cu hende homber, pero ta mas probabel cu e hende homber lo cumpra un otro timeshare compara cu e hende muher.
- Conociendo e limitenan existente pa e crecemento den e cantidad di unidadnan, purba aumenta e gasto pa grupo door di encurasha nan pa trece un amigo of descuento pa compañeronan di biahe.
En general, e industria di timeshare di Aruba ta un gran fuente di poder economico na Aruba y ta contribui di diferente manera na e producto turistico general di Aruba. Tin hopi atributonan positivo pa e industria di timeshare na Aruba y un impacto economico positivo relaciona cu hopi di e sectornan na Aruba. Sinembargo, tin algun area cu tin mester wordo revitalisa mientras cu e industria di timeshare ta pasa den e fase nobo aki di inventa di nobo of di revitalisacion. Implementando varios di e recomendacionnan menciona anteriormente y posiblemente promove e cambio pa pensa riba “vacation ownership” na lugar di “timeshare” por yuda. Purbando di agrega balor na e experiencia general di timeshare mediante e evaluacion di e producto actual y door di crea experiencianan unico pa huespednan por yuda. Enfocando riba e generacion mas jong cu un spin nobo den un industria cu por tin mester di un poco gepolish of revitalisacion lo yuda nan gasta mas, y mehora e satisfaccion di e huespednan mas grandi combinando experiencianan unico cu e Aruba tradicional cu nan conoce y stima, lo por yuda tambe.