BUENOS AIRES, Argentina – Un periodista Argentino ta descendiente di pueblonan originario, Umawtufe Wenxu, a denuncia cu e red social Facebook a cera su cuenta pasobra e no por a identifica e nomber ey como berdadero, e agencia estatal Telam a informa diadomingo.
“Diaranson nan a inhabilita e cuenta pasobra Facebook ta bisa cu mi tin cu uza un nomber cu mi famia, bisiña y amigonan conocemi,” Umawtufe Wenxu.
“Desde cu mi tin uzo di rason, mi yama Umawtufe. Tur hende conocemi cu e nomber ey y desde cu Facebook a habri, mi tin un cuenta riba e red social aki y nunca mi a cambia di nomber. Di hecho mi cuenta riba e red social Twitter ta @umaw y te cu awor aki ningun hende a denuncia e nomber,” el a bisa.
Umawtufe tin 30 aña a integra e servicio informativo di Radio Universidad CALF. E ta e musico di e grupo Puel Kona y miembro di Lof Newn Mapu di Neuquen, capital di e provincia di e mesun nomber, un 1200 kilometer zuidwest di Buenos Aires. Den e districto ta calcula cu ta biba mas of menos 60 mil mapuche, pueblo originario di e region.
“Mi mester a haci un download caminda cu mi a splica dicon mi yama Umawtufe. En cuanto e cuestion cultural, mi a argumenta cu nan tambe a base di e convenionan internacional como OIT of e Declaracion Universal di e Derecho di e Pueblonan Indigena di Nacionnan Uni, cu ta splica principalmente cu tur integrante di pueblonan Indigena tin derecho na un teritorio pero tambe na un nomber y na uza su idioma y na reconoce su identidad a base di esey,” el a afirma.
Wenxu a indica cu Facebook, te awor aki, no a responde na e reclamonan.
Fuente: NTN24