KUALA LUMPUR, Malasia – Polis di Malasia a informa awe cu un diplomatico di e embahada di Noord Korea na Kuala Lumpur ta sospechoso di e crimen di Kim Jong-nam, e mita ruman di e lider supremo, Kim Jong-un, cu a wordo asesina siman pasa den e aeropuerto di e pais Asiatico.
Autoridadnan ta identifica e sospechoso como un alto funcionario di e embahada, hefe di polis, Khalid Abu Baker, a informa den un conferencia di prensa. Ademas, tin un di dos sospechoso cu ta un empleado di e aerolinea Noord Koreano Air Koryo. Ta kere cu ambos ta sigui na Malasia, segun Khalid, DPA a cita.
“Nos a pidi permiso na e embahador Noord Koreano pa interoga nan,” e hefe policial a indica. “Di contrario, nos lo obliga nan pa comparece.”
Kim Jong-nam, e yiu homber mayor di e dictador Kim Jong-il, fayeci na 2011, a muri dia 13 di Februari den e aeropuerto internacional di Kuala Lumpur, victima di venenamento ora cu e tabata pa abora un vuelo pa Macao. Sur Korea ta kere cu e regimen di Pyongyang ta tras di e asesinato.
E dos muhenan di nacionalidad Vietnamita y Indones, deteni pa ehecuta e crimen, a train prome e procedimento den centronan comercial di e capital di Malasia, Khalid a sigura. “Nan a wordo entrena pa frega e cara (di e victima) y nan tabata sa cu (e substancia) tabata toxico,” el a afirma.
“Boso a wak e video, caminda cu por mira e muhe bayendo direccion di e baño,’ el a agrega di e imagennan di e circuito cera di e aeropuerto.
En total a wordo deteni cuater persona relaciona cu e asesinato, pero e amigo di e muhe Indones a wordo poni awe di nobo den libertad. E dos muhenan lo sigui den prizo por lo menos pa shete dia mas.
Fuente: El Universal