E CPI pa luna di Maart 2018 ta 119.44 , loke ta representa un subida di 0.5% compara cu e indice di Februari 2018 (118.79) y acumulando un subida di 1.5% te cu na Maart di e aña aki. E cambio di e CPI pa e ultimo diesdos (12)lunanan (Maart 2017 te cu Maart 2018) ta 2.6%, un subida di 2.7ppt comparacu e periodo corespondiente di aña pasa (0.1%). E promedio anual di e tasa di inflacion pa e periodo di Maart 2017 te cu Maart 2018 ta 0.04%, un subida di 0.7ppt compara cu e -0.7% registra den e periodo di Maart 2016 te cu Maart 2017. Durante e luna aki, seis (6) di e diesdos (12) sectornan a registra subida di prijs. E subidanan cu tawata tin e mayor efecto riba e CPI a wordo registra pa e sectornan di “Transporte” (1.0%) y “Recreacion y cultura” (2.1%), causando cada uno, un efecto di 0.18ppt .E subidanan den e restante sectornan a contribui cu un efecto di 0.24ppt riba e CPI di Maart 2018. E subidanan aki a wordo contraresta parcialmente door di principalmente un caida den e indice di e sector di “Vivienda” (-0.1%), cu a contribui cu un efecto di-0.03ppt riba e CPI di Maart 2018. E caidanan den e sectornan restante a contribui cu un efecto di -0.03 ppt riba e CPI di Maart 2018. E subida den e sector di “Transporte” a wordo causa principalmente door di un subida den e categoria “Servicio di transporte” (17.8%), causando un efecto di 0.22ppt. E subida den e sector di “Recreacion y cultura” a wordo causa principalmente door di subida di 25.3% den e categoria “Vacacion”, causando un efecto di 0.14 ppt. E caida den e sector di “Vivienda” a wordo causa door di un caida den e categoria “Mantencion y reparacion di vivienda” (-1.0%), causando un efecto di-0.04ppt. E canasta di consumo di e CPI ta consisti di 452 bienes y servicionan. Compara cu Februari 2018, 34.3% di e bienes y servicionan aki a conoce un aumento di prijs causando un efecto di 0.85ppt, mientras cu 30.5% ta mustra un caida di prijs, cu a contribui cu efecto di -0.31ppt y pa e restante 35.2% no tawata tin cambio den prijs. Prijsnan di bienes a subi cu 0.2% na Maart 2018 y a causa un efecto di 0.10ppt riba e CPI di Maart 2018. Prijsnan di servicionan a conoce un subida di 1.2% y a causa un efecto di 0.45ppt. E CPIC (core inflation) -CPI excluyendo e efecto di energia y cuminda-a registra na Maart 2018 un subida di 0.6%, un subida di 0.1ppt, compara cu e periodo corespondiente di aña pasa (0.5%). E indice di energia -cu ta consisti di e productonan: electricidad, awa, gasolin y diesel a registra un caida di 3.1%, cu ta 2.7ppt mas halto compara cu e periodo corespondiente di aña pasa ( -5.8%). E indice di cuminda a registra un subida di 1.7%, cu ta 1.4ppt mas halto compara cu e periodo corespondiente di aña pasa (0.3%). E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Maart 2018 ta Afl. 4,435, mientras cu pa un hogar di un (1) adulto e suma ta Afl. 2,112.
Cambio di prijs di petroleo, utilidad, gasolin y diesel na Maart 2018
Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Maart 2018 e prijs promedio pa bari di petroleo (US$ 62.82) a conoce un subida di US$ 0.23 (0.4%) compara cu Februari 2018 (US$ 62.59). E costo total di energia pa kWh pa un uso di electricidad te cu 500 kWh no a cambia na Maart 2018, el a keda Afl. 34.52cent pa kWh. E costo total di energia pa kWh pa un uso di entre 501 -1000 kWh no a cambia na Maart 2018 , el a keda Afl. 35.72cent pa kWh. Adicionalmente, e costo total di energia pa kWh pa un uso di electricidad riba 1000 kWh no a cambia na Maart 2018, el a keda Afl. 45.93 cent pa kWh. Prijs di electricidad y di awa no a cambia compara cu Februari 2018. Consecuentemente, e prijs promedio di electricidad pa vivienda a keda Afl. 265.65, mientras cu e prijs promedio di awa pa vivienda a keda Afl. 137.05. Prijs di gasolin a baha na Maart 2018 cu Afl. 1.10 cent (-0.6%) y a causa un efecto di -0.03ppt riba e CPI. Prijs di diesel a registra un caida
di Afl. 3.30 cent (-2.0%) na Maart 2018 y a causa un efecto di -0.01 riba e CPI. Maart 2018, utilidad, gasolin y diesel como grupo, tawata tin un caida di prijs di 0.2% compara cu Februari 2018 y hunto a influencia e CPI cu -0.04ppt, mientras cu e restante 448 bienes y servicio hunto a experencia un subida di prijs di 0.7% y tawata tin un efecto di 0.58 ppt riba e CPI.
Cambio di prijs di Cuminda y servicio di catering na Maart 2018
E indice di “Cuminda & servicio di catering” a registra un caida leve di 0.04% na Maart 2018, despues di un subida di 2.7% na Februari 2018. E indice di “Cuminda na cas” (-0.1%) a registra un caida,unda shete (7) di e diesun (11) indicenan di e gruponan di cuminda na cas a baha na Maart 2018. E indice di “Berdura” a conoce e caida di mas grandi (-1.4%) na Maart 2018. E indicenan di “Batata, yuca y batata dushi” (-0.9%), “Azeta y otro productonan traha di vet” (-0.2%), “Pan y otro productonan di grano” (-0.2%) y “Restante productonan pa alimentacion” (-0.2%) tambe a registra caidanan. E indicenan di “Lechi, keshi y webo” (0.9%) y “Carni” (0.3%) a registra subida di prijs. Den e ultimo diesdos (12) lunanan e indice di “Cuminda & servicio di catering” a subi cu 4.8%. E indice di “Cuminda na cas” a conoce un subida di 5.7% . E indice di “Fruta” a subi cu 35.0%, e subida di mas grandi entre e gruponan di cuminda na cas, mientras cu e indice di “Batata, yuca y batata dushi” a conoce e caida di mas grandi cu 1.5%. E indice di “Cuminda pafo di cas”no a registra cambio na Maart 2018, despues di un subida di 0.2% na Februari 2018 y registrando un subida di 2.0% den e ultimo diesdos (12)lunanan. Na Maart 2018 , “Cuminda na cas” y “Cuminda pafo di cas” como grupo, tawata tin un caida leve di prijs di 0.04% compara cu Februari 2018 y hunto tawata tin un influencia di-0.01 ppt riba e CPI, mientras cu e restante bienes y servicio hunto a experencia un subida di prijs di 0.7% y tawata tin un efecto di 0.55ppt riba e CPI.
Bestaansminimum na Maart 2018
E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia según e prijs di cuminda, paña, vivienda, transporte y otro articulonan den e “canasta”. Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 15+) y un peso di 0.3 pa cada mucha (edad 0 -14 aña). E bestaansminimum ta basa riba cifranan di e rapport “Bestaansminimum 2010” cu CBS a publica na December 2010 y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-14 aña). Na Maart 2018 e bestaansminimum mensual pa un hogar cu ta consisti di dos (2) adulto y dos (2) mucha (edad 0-14 aña) (Afl. 4.435) ta mustra un subida di Afl. 125 compara cu Februari 2017 (Afl. 4.310) y a wordo causa principalmente door di un subida di Afl. 89 den e sector di “Cuminda y bebida no-alcoholico”. Na Maart 2018 e bestaansminimum mensual pa un hogar cu ta consisti di un solo adulto ta Afl. 2.112, cual ta representa un deficit di entrada di Afl 401, un subida di Afl.27.- compara cu e deficit observa un aña pasa (Afl. 374,-). E deficit aki ta e di dos mas halto registra den un periodo di cinco (5) aña pa luna di Maart.