Na varios ocasion nos por a tende y lesa tocante “inclusion” di nos hendenan cu Down Syndrome den nos sociedad. Pero e pregunta ta si nan ta compronde e nificacion di inclusion??? parlamentario Dangui Oduber ta cuestiona.
Con nos tin cu categorisa “inclusion general” den nos sociedad y con inclusion por yuda y influencia e bida di nos hendenan cu “Down Syndrome?”
Prome cu tur cos ”inclusion di nos hendenan cu Down Syndrome” mester por cuminsa den nos sistema di enseñansa, caminda muchanan cu Down Syndrome mester por ricibi nan educacion hunto cu muchanan cu no tin limitacion, cuminsando for di peuterschool te cu e nivel mas halto den nos enseñansa. Esaki lo yuda desaroya e studiantenan cu Down Syndrome di tal manera cu e docentenan por descubri nan habilidad y talentonan, cual mañan y den futuro por forma nos hendenan cu Down Syndrome den adultonan cu por forma parti di nos mercado laboral sea como un empleado, profesional, of doño di nan propio negoshi. Cu otro palabra nan, esta nos hendenan cu Down Syndrome tin e oportunidad di forma parti di e desaroyo den nos sociedad. Aki nos por pensa tin un guia special y begeleider pa e muchanan special aki.
Inclusion den nos sociedad cuminsando den nos sistema di enseñansa lo yuda evita/preveni “Bullying y descriminsashon” y crea mas compasion, comprension y inclusion den nos sociedad cual al final mester ta e meta, pa nos por tin un sociedad progresivo!
Por constata tambe cu gran parti di esnan cu Down Syndrome tin difficultad pa forma parti di nos mercado laboral, sea debi cu nan ta diferente of nan habilidad ta limita. Tur esaki por wordo evita si tabata tin for di cuminsamento e formashon di inclusion hinca den nos sistema di enseñansa y den nos mercado laboral.
Tambe por constata cu acceso na servicio di cuido ora cu nan yega e edad di adulto of edad mas avansa ta bira dificil of hasta imposibel.
Si tene cuenta cu tur loke cu ta bira dificil y asta causa limitasion den e bida di esnan cu Down Syndrome, e mensahe mester ta cu nos como sociedad mester realisa y acepta cu “inclusion general” di nos hendenan cu Down Syndrome lo kibra tur barera cu ta stroba e desaroyo den nan bida.
Pa por garantisa “Inclusion General” mi lo cuminsa traha riba un ley iniciativa cu ta garantisa cu nos hendenan cu Down Syndrome mester di inclusion den nos Sistema di educacion (enseñansa), laboral, deporte, salud y cuido; igual cu hendenan cu no tin limitacion.
E ta un hecho cu mundialmente tin un lucha pa inclusion di nos muchanan cu Down Syndrome den e sistema di enseñansa riba tur nivel igual, cu muchanan sin limitacion, paso a keda comproba cu “incorporacion” a resulta miho pa hopi individual den nos sociedad, eliminando discriminasion, bullying y creando un miho sociedad.
Ta spera cu ora di entrega e ley iniciativa aki di inclusion esaki lo conta cu sosten no solamente di Parlamento pero tambe di nos sociedad completo.