E siman aki Minister di Husticia, Sr. mr. Andin Bikker ya a cuminsa coordina algun trabounan pa e departamentonan cuminsa traha hunto pa por traha mas miho ariba siguridad di nos pais. Sr. mr. Andin Bikker, minister di Husticia ta amplia mas ariba e tema aki.
Den tres dia di trabao, ya nan a surpasa un tiki e hecho cu nan no a haya mucho cooperacion, mas cu’n handshake mas cu’n documento di traspaso. Pero asina mes a cuminsa traha di biaha. Y porfin a haya internet den su oficina. Resumiendo, el a cuminsa cu e reunionnan cu e diferente departamentonan cu ta resorta bou di su ministerio, e.o. Wardacosta. Un di e prioridadnan ta pa rece siguridad bek nan nos pais. Y den cuadro di e fronteranan, esaki ta algo hopi importante. P’esey a tene un reunion cu Wardacosta y diabierna minister lo tin un reunion cu Wardacosta y KPA, di cual ya caba e siman aki el a reuni tambe cu nan.
Tur cos ta draai hopi biaha rond di leynan y esey ta cay bou di ministerio. A cuminsa haci un inventarisacion di leynan pendiente, pa combati criminalidad pero tambe pa loke ta e tereno social, ya cu tin cierto aspectonan di problemanan social cu ta desemboca den criminalidad. Y tambe e minister ta atendiendo cu aspectonan, con e presupuesto ta andando, cu mester cla prome cu 15 di December.
Mas aleu, Sr. mr. Bikker a sigui bisa, tin un hala di trabao pero semper ta bon pa goberna den tempo di crisis ya cu den tempo di abundancia ta mas facil pa goberna, pero cu nan ta prepara pa e retonan aki. Nan ta inventarisando pero tambe adelantando e trabaonan pa e pueblo por ta satisfecho di e trabaonan cu nan ta desplega.
Ora cu tin cierto fechanan cu tin cu respeta, pero cu capacidad limita pa e dianan cu ta resta, mester pone prioridad. Prioridad ta atende cu presupuesto, y tambe e presupuesto supletorio. Un hala di debe cu a hereda di e gabinete anterior. Tambe for di e tempo di incertidumbre cu e gobierno anterior, practicamente a bay campaña di Januari caba bin ariba, y den periodo asina hopi decision a keda paga. Aworaki ta atendiendo di retrasonan cu a acumula, pero pa esey e gobierno actual t’ey y pueblo por ta sigur cu nan ta haci nan maximo esfuerso cu nan ta traha pa caba cu tur retraso. Nan ta atendiendo tur cos, di esun di mas chikito, te cu esun di mas grandi.
Di parti di husticia tin otro desaroyonan cu tambe ta hayando atencion manera e tema di piscadonan cu a haya un decreto pa stopnan di pisca. Minister di Husticia ta splica cu tur cos ta hayando oido. Ta trahando con pa adapta e decreto pa haci e ley un decreto cu eigenlijk mester ta realistico, cosnan cu practicamente tur dia ta wordo pisca.
E loke ta siguridad, e ley di Codigo Penal cu a keda pega pa hopi aña pa trece siguridad bek, instrumento pa Cuerpo Policial y falta di material na diferente departamentonan. Y tur otro cosnan cu poco poco ta yegando ariba su desk, di diferente directornan di departamentonan, pa ekipa esakinan mas miho y pa fin di aña por ta visibel cu tin un gobierno nobo cu ta traha na bienestar di e pueblo.
Door cu mester pone cierto prioridadnan , pa loke ta presupuesto 2018 y e presupuesto supletorio, mr. Bikker a haci un inventarisacion cu DWZ pa wak kico por haci prome cu aña cera, teniendo na cuenta e dianan cu Parlamento ta observa, ora cu fin di aña yega y Raad van Advies, tin practicamente menos di un luna, ya cu banda di dia 15 pa 18 di December, tradicionalmente y/o departamentonan of instancianan ta baha cu receso pa Pasco. Ta keda menos di un luna pa encamina cierto cosnan. Pero si por pidi pa duna prioridad na e ley di Codigo di Prodecimento Legal cu ta un instrumento valuabel pa Cuerpo Policial y tur e instancianan cu ta trata cu criminalidad. E ley social di Reorganisacion di Debenan cu tin mas di 40% di e poblacion ta biba bou di e “bestaansminimum”, cual mester atende mas pronto posibel, segun mr. Andin Bikker, minister di Husticia.