DEN HAAG, Hulanda- Turkia y Hulanda ta normalisa nan relacionnan diplomatico. Esaki kiermen cu lo tin un embahador Turco na Den Haag y un embahador Hulandes lo bay Ankara. E noticia aki a wordo confirma door di Minister Stef Blok (Relacionnan Exterior) den Tweede Kamer.
E relacionnan cu Turkia tabata bou di presion grandi despues cu na aña pasa maart, gobierno Hulandes a prohibit dos Minister Turco pa haci campaña na Hulanda pa nan president Recep Tayyip Erdogan. E disturbio cu esaki a ocasiona tabata motibo pa e dos paisnan yama nan embahador bek.
“E ta un bon señal cu Hulanda y Turkia ta bira e blachi aki hunto y cu nos por normalisa nos relacionnan”, Blok ta bisa. “Esaki ta necesario pa por papia libremente tocante asuntonan cu ta toca nos, pero tambe riba asuntonan di cual nos ta diferencia di opinion.
Ademas di combersacionnan riba nivel gubernamental, Blok mes tabata tin dos reunion cu su colega Turco Mevlut Cavusoglu, den cuadro di e reunionnan di NATO. Esaki parcialmente tabata e motibo pa cual a normalisa e relacionnan entre ambos pais.
Den e combersacionnan aki e dos minsiternan aki a dicidi cu nan lo keda diferencia den opinion tocante e sucedidonan di maart aña pasa. Perot a net p’esey, segun Blok, ta importante pa tin un “relacion diplomatico complete”.
Blok ta enfatisa cu tin cuestionnan importante ta hunga un rol entre Hulanda y Turkia. “Pensa ariba e combatimento di ISIS, e risico di combatientenan cu ta regresa for di Siria y cuestionnan consular, pero tambe nos preocupacionnan riba e estado di derecho y tambe e situacionnan di derechonan humano na Turkia”.
E decision final pa tin relacionnan diplomatico entre ambos pais a cay diabierna durante un combersacion telefonico cu ambos minister. Eyden a wordo palabra cu Blok lo bishita Turkia ainda e aña aki.