Minister di Husticia a hay’e den un situacion di un protocol cu den su concepto tabata regla caba. Awo el a bin hay’e den su scochi y e ta un tiki dificil hinca den otro. Sr. Alan Howell, di POR ta amplia.
E protocol cu Hulanda kier cera nobo, ta duna e impresion cu Hulanda kier mas acceso of impone den cierto, manera di bisa, den Aruba su sistema hudicial. Esaki tin di haber cu presencia di RST na Aruba. E ta yuda cu casonan grandi di crimennan organisa pafo di nos frontera. Dne e protocol nobo aki, Hulanda kier impone mas acceso, mas poder y tur hende sa cu mester tene cuenta cu imposicionnan aki.
Corectamente, un alarma a zona cerca e minister na momento cu el a mira e exigencia of rekisitonan cu nan ta bin cun’e. Esaki cu ta no ta straño si. E minister di Husticia ta un hurista y corectamente a tuma un decision cu ministerraad a bin busca sosten na Parlamento. Parlamento ta e hefe di gobierno. Hopi biaha den pasado por a mira ministerraad ta wheel and deal ariba nan smaak. Y ora cu palo coi curpa, ta core bin parlamento. E sistema di traha di e minister ta esun corecto, el a bin pone parlamento na altura den e reunion comsion fiho di husticia. Ora cu nan tambe a haci un investigacion den e documento aki, di ningun manera nan tampoco por a sostene loke cu Hulanda kier bin cun’e. Pa es motibo aki, Sr. Howell ta sinti cu parlamento completo, coalicion cu ta sostene gobierno y esunnan di oposicion ta ariba e mesun liña. Mirando e forma con a compila e carta aki, no por duna sosten y bay di acuerdo pa algo asina aki tuma luga na Aruba.
Hopi biaha Hulanda ta bin cu formanan unda cu nan tin grip of algo di bisa cerca instancianan. Netamente esey semper mester tene wowo habri. “P’esey tin status aparte, pa nos por ta ariba nos mesun pianan. Nos por domina, controla y traha ariba nos mes. Nos no mester di Hulanda pa bin bisanos kico pa haci y con pa maneha”. Sr. Howell a sigui bisa cu hopi biaha nan ta purba di pasa Aruba un fastball, pero gewoon nan kier tin mas cos di bisa. Pero mester para firme pa nan no pasa Aruba un fastball. Y ta tur e fraccionnan den parlamento ta ariba e mesun liña.
Ora ta trata di cosnan cu ta regarda nos pais, ta pone e bandera politico di cada un, un banda y pone esun di Aruba bo dilanti. Mester sali na vanguardia di Aruba su economia y di Cuerpo Policial di Aruba. Hulanda no mester bin bisa Aruba con pa maneha Cuerpo Policial y Husticia. Mester separa e dosnan aki for di otro. Si Hulanda kier duna sosten financiero of sosten di specialisacion di recherchenan specialisa den cierto casonan, nan ta bon bini. Pero pa bin cu’n nota caminda ta bin purba pone Aruba den schaakmaat pa haya zeggenschap pa bin wheel and deal na smaak, esaki no ta bay pasa.
E minsiter di husticia ta hurista y Aruba aworaki ta gosa di un parlamento cu por lo menos 3 polis den dje. Ta casi imposibel cu e fastball aki por pasa. Si esaki pasa, ta un berguensa pa parlamento di Aruba, y Hulanda mester respeta esey, señor Alan Howell a finalisa bisando.