AMSTERDAM, Hulanda- Diabierna Hulanda a wordo eligi como miembro di e Conseho di Siguridad di Nacionnan Uni. E eleccion tabata mas bien un formalidad, ya cu Hulanda y Italia aña pasa ya caba a bay di acuerdo pa comparti e asiento pa e periodo di 201- 2018.
Ambos pais aña pasa a competi pa un puesto temporal di dos aña, pero niun di dos a logra suficiente apoyo. A keda acorda cu Italia lo haci uzo di e asiento aki pa e aña aki y Hulanda lo ocupa e puesto aki otro aña. Ta masha poco biaha un asiento temporal ta wordo comparti pa dos pais.
E Conseho di Siguridad ta dirigi ariba e mantencion di paz y siguridad y por impone sancionnan, desplega tropanan di paz y tambe influi den politica. Merca, Rusia, China, Francia y Gran Bretaña ta miembronan permanente di e Conseho di Siguridad.
Esaki ta di seis biaha desde 1946 cu Hulanda ta miembro no permanente di e Conseho di Siguridad di Nacionnan Uni.
“E miembreci ta un forma excelente pa tin influencia ariba e nivel di mas halto y trece puntonan cu ta di vital importancia pa nos, ariba agenda”, segun minister Koenders di Relacionnan Exterior.
Fuente: www.anp.com