NUEVA YORK, Merca- E huicio contra di e comediante Bill Cosby pa cargonan di agresion sexual a termina diasabra. E ta un proceso anula despues cu miembronan di e hurado no a logra di yega na un acuerdo. Huradonan tabata tin 52 hora di deliberacion tras di lomba, den 6 dia, segun fuentenan local a informa.
E hurado a confirma na e hues cu nan no por a yega na un decision unanime relaciona cu si e strea di “The Cosby Show” a droga pa despues abusa di un empleada di e Universidad di Temple, Andrea Constand, den su cas na Philadelphia na 2004.
Asina tambe, hues Steven O’Neill ta declara e huicio di e comediante di 79 aña, nulo.
Aunke ta trata di un victoria momentaneo pa e comediante, Ministerio Publico tin e posibilidad di exigi cu huicio nobo.
E comediante Afro- Americano ta wordo acusa di tres cargo di agresion sexual. Cada cargo tin un castigo di 5 pa 10 aña di prizon, como minimo. Pero expertonan legal ta sigura cu e sentencia pa cada acusacion mester core di manera simultarneo bou di e ley di Pennsylvania.
Durante e seis dia di huicio, e hurado a skucha e declaracion di Constand pa describi e encuentro sexual cu Cosby, den su cas di Philadelphia, na 2004.
Coby a declara su mes inocente di tres cargo di abuso indecente den e huicio cu a cuminsa siman pasa. E unico cargonan criminal deriva di casi 60 acusacion di mal conducta sexual den su contra den e ultimo dos añanan.
E acusado principa den e caso aki, Andrea Constand a relata un paar di dia pasa na miembronan di hurado su historia cu e actor, kende el a acusa di a probecha di dje, despues di a dun’e varios pildo pa e bebe, cualnan a lag’e lam y indefenso.
Cosby, cu ta casi ciego, a haci uzo di su derecho di no declara durante e huicio. E denuncianan di abuso cu ta colga ariba Cosby su cabes ta data for di 1960 y ta demasiado bieu pa wordo persigui penalmente. P’esey e fiscalnan ta kere cu e caso Constand por ta crucial pa prueba e agresionnan sexual, cu varios muhe supuestamente lo a sufri durante varios aña.
Fuente: www.yahoonews.com