Riba invitacion di e Federacion de Levantamiento de Pesas Panamericano, FPLP, Sr. Hugo Themen den su calidad como presidente di AAWA a wordo invita pa e Congreso Panamericano cu a tuma luga e dianan 12 pa 19 di mei, esaki den combinacion cu e funcion como referee di sr. Themen den e Campeonato Panamericano de Mayores de Levantamiento de Pesas teni na e ciudad di Santo Domingo, Republica Dominicana. E federacion Panamericano di hisamento di peso ta trahando pa modifica nan constitucion unda diferente puntonan interesante a bin padilanti durante di e dianan na dicho Congreso.
Pa e motibonan aki e federacion Panamericano di Levantamiento de Pesas tabata satisfecho cu e sosten maximo di tur su miembronan den e region Panamericano. E mayoria di tur pais miembro a participa den forma activo na e congreso pa asina hunto tuma e decisionnan corecto encuanto e futuro di e deporte di hisamento di peso den e continente Panamericano. Esaki lo yuda na engrandece e desaroyo di e deporte di pesas den su totalidad y duna mas oportunidad na e atletanan den e region Panamericano sigui luci riba e plataforma mundial.
Mester bisa cu e e deporte di Pesas lo ta parti di e Weganan Olimpico di Tokyo 2020 pero no ta sigur di un participacion den e futuro weganan cu lo sigui. Pa e motibo aki mes e federacion mundial IWF lo introduci un sistema di regla anti-dopahe “innovativo y creativo” dirigi specialmente pa paisnan cu a viola a regla anti-dopahe. Cu e esaki e federacion mundial kier sigura cu e deporte lo keda participa riba termino largo den e programa Olimpico.
Stichting Sportsubsidie Aruba a subsidia e biahe di Sr. Hugo Themen pa e Congreso Panamericano organisa pa Federación de Levantamiento de Pesas Panamericano na Republica Dominicana.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.