Hugo Groeneveld ta duna bek na Aruba

0

Hugo Groeneveld, kende ta naci na Hulanda, a celebra su di 90 cumpleaños hunto cu miembronan di famia y amigonan, recaudando fondo pa loke el a considera un gran idea.
E kier a duna e habitantenan di Maris Stella un fiesta, cu algun bebida alcoholico y pasapalo, y e kier a comparti e momentonan alegre aki cu nan via Skype, for di su cas na Hulanda.
Hugo tabata un maestro di scol na Aruba for di 1957 pa 1969, dunando les na Graf von Zinzendorf School, na John Wesley College, y Mon Plaisir College. El a disfruta di su tempo riba e isla y ta recorda cu hopi amor su añanan cu el a pasa akinan. Desde e tempo ey el a regresa hopi biaha, pa bishita su yiu muhe Annette, kende a casa na Aruba, y dos aña pasa el a disfruta tambe di Annette su fiesta di 25 aniversario di bruid riba e isla.
Hugo su yiu muhe mas grandi, Flora de Bie-Groeneveld, tambe ta biba na Aruba desde 1990 hunto cu su famia. E ta e gerente fantastico di cuido na e institucion gubernamental di ancianonan.
Naturalmente, Hugo a bishita Maris Stella den transcurso di e añanan y a bin topa cu algun di su ex- coleganan, kendenan debi na e hecho cu nan tabata biba den e instituto gubernamental, tabata perde e experiencia di algun aspecto placentero di bida pafo di e edificio.
Y ya cu el a pensa cu e tabatin tur cos caba, el a uza su 90 cumpleaños pa recauda fondo pa un fiesta improvisa pa su amigonan.
Su esfuersonan tabata exitoso. Na su celebracion di cumpleaños cu a tuma luga riba Diadomingo, 3 di September, na cas di su yiu homber Maurice, na Hertogenbosch, Hulanda, Hugo a colecta un total di Afl. 1500.
Y di eynan su yiu muhe Flora a uza e placa na un manera sabi, cumprando koekoei, ponche crema y Guinness, cerbes local, juicenan y refresco, dunando un treat na e habitantenan anciano dos biaha, esta riba 4 di November y 26 di November.
Mientras cu Hugo recientemente a wordo diagnostica cu algun problema serio di salud, y su bista ta bayendo atras, asina mes el a logra di wak riba su computer e imagennan di e ancianonan na Maris Stella, disfrutando di e momento.
Yiunan Michiel, Flora, Annette y Maurice, partner di bida Dimphna, nietonan Philllip, Floris, Maarten y Diederik, bisanieta Mina Flora, ta orguyoso di nan hefe di famia, naci na Rotterdam riba 24 di augustus 1927, y kende semper tabata un homber increiblemente fuerte, bibando un bida saludabel sin huma pero cu e bebida ocasional. Un viudo trempan den bida despues cu su esposa Johanna Wilhelmina Meyer a fayece, el a disfruta di e ultimo decadanan aki cu un di dos partner excelente, pero recientemente el a wordo informa cu e tin solamente algun luna mas pa biba. Sinembargo e ta disfrutando di su bida y ta gusta haci otronan feliz.