Diabierna a tuma luga den Corte di Prome Instancia e caso contra di e dama Chines M.T. cu ta wordo acusa di a hinca ex- director di Serlimar, Sr. R. Fingal mata.
POSPONE
Fiscal a cuminsa na pidi hues pa pospone e caso, pa motibo ainda tin cierto investigacionnan cu no ta cla. E sospechoso tabata tin un combersacion cu e famia, y aki ta unda algun informacion a bin sali na cla cu lo mester wordo investiga. Ta di sumo importancia pa sigu cu e investigacion. Tambe Ministerio Publico lo kier busca mas informacion cu lo por tin den e telefon di e defunto, y cual telefon mester wordo gehack ya cu niun hende no conoce e code pa habri e telefon. Pa esaki Fiscal a pidi Hues pa pospone e caso pa tres luna mas.
ABOGADO
Abogado mr. Chris Lejuez no a bay di acuerdo cu e peticion. Segun mr. Lejuez, kico mas lo por sali afo, ki informacion mas lo por tin relaciona cu e caso aki, cu Ministerio Publico no tin ainda. Al contrario, Ministerio Publico tabata sa for di December 2016 caba e fecha riba cual e caso lo wordo trata. Y dicon awo cu e dia a yega, awo ta pidi pa pospone?
Segun e abogado, si bay pospone e caso un biaha mas, aki tres luna lo ta yegando e aña caba cu e caso a sosode. Y mr. Lejuez no ta haya cu ta necesario
HUES
Hues a bay di acuerdo cu e defensa, ya cu e tampoco no ta haya ta necesario pa investiga e telefon di e victima. El a yama esaki mas bien un “fishing expedition”.