MEXICO – Un hues Mexicano a concede diahuebs e extradicion di Joaquin “El Chapo” Guzman pa Merca, fiscalia general a informa, pero e abogadonan di e capo Mexicano lo apela e decision.
Di 13 husgado di e Districto di Amparo den Material Penal na e Ciudad di Mexico, a notifica Ministerio Publico cu e recursonan huridico interponi pa e defensa di e lider di e cartel di Sinaloa pa evita e extradicion a wordo rechasa, di tal forma cu “ta concede su extradicion,” e institucion a indica den un comunicado.
Despues cu e canciyeria Mexcano a bay di acuerdo na Mei di e solicitud di extradicion haci pa e Gobierno di Merca, abogadonan di Guzman a pone dos recurso di amparo, y dia 26 di September, un hues a cuminsa cu un periodo di analisis.
Su defensa a bisa cu nan tin instruccion di e capo di bringa “te na ultimo” pa evita cu e ta wordo enhuicia riba teritorio Mericano, incluso pidi Corte Suprema di Husticia pa su intervencion.
Andres Granados, un di e abogadonan di “El Chapo” a bisa diahuebs cu nan lo bay tin 10 dia habil desde diamars otro siman pa pidi cu un tribunal colegiado revisa e determinacion di e hues di districto.
“Nos no ta perdi,” Granados a bisa.
Guzman ta wordo rekeri pa tribunalnan di Texas y California pa cargonan cu ta inclui asesinato y narcotrafico.
Siman pasa e comisionado nacional di Siguridad, Renato Sales, a bisa cu e Gobierno Mericano ta spera cu e por wordo extradita na Januari of Februari.
Fuente: RCN Noticias