Diahuebs Corte di Prome Instancia a trata caso di e trio Hulandes cu ta wordo acusa di transporte di mas di 14 kilo di cocaina. E caso aki a wordo trata caba na December, pero un di e sospechosonan, R.K. a mustra Hues cu contrario na loke e otro sospechoso, S.O. ta bisa cu e no tabata sa di nada, e por prueba cu S.O. ta gaña, kende na su turno a bisa cu tur esaki ta un set up contra di dje. Door di esaki, Hues a dicidi pa pospone e caso y laga autoridadnan na Hulanda scucha dos testigo.
E caso a wordo trata na December 2016, caminda cu Fiscal a acusa e trio Hulandes aki cu riba 6 September 2016, di tabata tin intencion di transporta 14.130,6 gram di cocaina cu tabata parti den diferente maleta. Segun fiscal, e mas tristo ta cu tabata tin un mucha di 4 aña tambe hunto cu nan, cual ta yiu di R.K. Na momento di nan detencion, e menor a wordo hiba Casa Cuna. Na December Hues a duna ordo pa scucha dos testigo na Hulanda, .K. a bisa Hues cu e tin prueba cu S.O. tabata sa di e transporte di droga.. E abogadonan, Fiscal y Hues lo tin chens pa lesa y studia e combersacionnan aki. Pero ayera mainta durante tratamento di e caso, a bin resulta cu e dos testigonan na Hulanda no a wordo scucha ainda. Pa tal motibo, Hues mr. Winfield a dicidi pa pospone e caso aki un biaha mas.
Abogado
Abogado di W.V. y S.O., mr. Faarup den su pleidooi a bisa cu ya caba mester a warda 3 pa 4 siman prome cu e caso a bin dilanti, y awo ta resulta cu ainda e caso no ta cla, ya cu e testigonan mester wordo scucha ainda. E la mustra ariba e hecho cu W.V. tin un yiu chikito, cu actualmente ta na Casa Cuna. Y cu pakico no ta laga un familiar di Hulanda bin busca e muchanan pa nan bay cun’e. Un otro opcion, segun abogado mr. Faarup ta pa laga S.O., cu ta wela di e criatura, den libertad, ya cu e no tabata na altura di cu lo mester a transporta droga, y cu ta cu vakantie el a bin Aruba. A pidi pa lag’e den libertad p’asina e por bay cu su nieta bek Hulanda.
Hues a nenga peticion di e abogado y a pospone e caso pa dia 20 di April 2016, pa 2 or di atardi. Por a mira claramente cu S.O. su emocionnan tabata halto y cu e no a gusta cu e lo mester bolbe warda 6 pa 8 siman, prome cu e caso bin dilanti un biaha mas.