E hues, Teori Zavascki, e hues principal den e caso di Petrobras den Corte Supremo di Husticia na Brazil, a fayece diahuebs den un accidente di avioneta na Rio de Janeiro.
Fiscal General, Rodrigo Janot, a publica den un comunicado cu e ta lamenta el fayecimento di e magistrado y ta honra e contribucion grandi na e Estado Democratico di Derecho. Por lo menos dos persona mas a fayece, aunke ainda no tin confirmacion oficial.
Como hues principal den e Caso Petrobras den e Supremo Tribunal Federal, Zavascki, di 68 aña, tabata den e proceso di aprobacion di e confesionnan di 77 ex- ehecutivo di e contratista Odebrecht. Esaki tabata e scandal mas grandi di e historia di Brazil.
Su decision riba e “denuncianan di fin di mundo”, door di su potencial di implica politico- y miembronan di e elite di e gigante Suramericano, lo mester a bira conoci na Februari, despues di e reces hudicial.
E mancha grandi di “Petrolao, un red di soborno y desvio di fondonan publico cu a tuma luga den e compania estatal Petrobras den e ultimo decadanan, a pone cu empresarionan grandi awe ta tras di tralie, y no a duna e clase politico un chens di hala rosea.