Riba e asunto di criminalidad, lamentablemente, segun Hubert Dirksz, presidente di FTA, ta un situacion hopi serio. Ta haya kico ta e motibonan cu Gobierno no a actua suficiente, cual tur por constata. Sa cu e polisnan ta haci un tremendo trabao, un esfuerso grandi. FTA ta aplaudi nan, ta apoya Cuerpo Policial pa e trabao cu e ta haci, pero ta lamenta si cu mas por wordo haci, pero no ta wordo haci, entre otro FTA ta kere cu e sugerencianan cu a wordo treci dilanti di parti di sindicatonan SPA, FTA, y SADA, mester wordo tuma mas na serio y traha riba dje y si tin mester di fondo, aloca fondo rapidamente y si mester bay Parlamento pa haci cambio, haci’e. Tin di compronde cu reunion di Parlamento a tuma luga pero e cambionan cu a spera ainda ta bay bastante slow. E ta mustra cu akinan ta trata di varios asunto, di maneho, pasobra a sugeri cu Douane, Kustwacht, Imigracion, Warda nos Costa y Polis ta traha hunto. A sugeri pa un ketenpartners bin hunto na mesa durante e combersacion cu tabata tin entre e tres sindicatonan y Gobierno, caminda cu nan a bisa cu lo bin cu un plan con pa atende cu esaki. Lamentablemente te cu awe no a wordo notifica di ningun plan. E trahadonan mes envolvi ta duna informacion cu esey no ta e caso. Si ta serio pa atende cu e problema, pakico no por tuma e pasonan corecto pa e trahamento hunto di e Cuerponan aki. Esey ta un di e puntonan cu tin e sindicatonan preocupa. Si mester di fondo,s segun Dirksz, si prioridad awor aki ta nos siguridad y si prioridad ta nos turismo, e ora ey no por pone nos pais na peliger, haci’e mas vulnerabel cu e ta, pasobra e consecuencianan nos tur ta bay carg’e. E ora ta demanda mas seriedad y responsabilidad di e Gobierno aki pa loke ta atende cu criminalidad, Dirksz a comenta por ultimo.