Un congreso basta grandi a keda haci ora cu 50 delegado a presenta na e reunion importante aki na FTA pa cual aki Hubert Dirks a splica mas di e reunion y kico a sali afo pa FTA.
E congreso tabata bon atendi, e sindicalista a splica. Esey ta nifica cu toch ainda e delegadonan ta interesa y ta critico riba e trabao cu e sindicato ta haci. Esaki ta pa duna cuenta na e delegadonan y delegadonan ta pa controla, coregi y bin cu sugerencia y tuma decisionnan pa mehora e funcionamento di e organisacion. Diaranson a trata principalmente e entregamento di e cuenta riba e situacion financiero. A entrega jaarrekening di aña 2013 y comparacion di otro añanan tambe. A haya splicacion di Pricewaterhouse Coopers cual ta haci regularmente, na momento di entrega jaarrekening, pasobra ta considera e profesionalismo ta necesario pa duna e trahadonan di conoce cu eynan ta papia di situacion hopi serio, placa di trahado y asina eynan ta haya sa tambe kico ta haci cu nan placa.
Otro puntonan cu a trata ta e asuntonan den e sectornan. Loke si por bisa cu hopi punto tabata bin dilanti, tin biaha riba maneranan cu ta trata un asunto. Ta haya por ehempel asuntonan di refineria ta bin dilanti. Asunto di All Inclusive ta bin dilanti. Otro leynan etc. Loke por bisa ta cu mayoria cu ta bin dilanti ta e trato di companianan na e trahadonan y cu mester bira mas fuerte cu mester ta fuerte pa para e companianan pa nan no considera bondad como debilidad. Tambe un punto cu a keda hopi cla, ta cu e asunto di ora cu un trahado ta bay AO, cu e compania ta trata tur trahado hopi dificil, den un forma como si fuera cu nan a haci malo. Sindicato ta kere cu esey mester cambia. Si tin trahado cu ta comporta nan mes malo of ta gaña cu nan ta malo, no ta duna motibo pa compania trata tur trahado mesun cos y cu ta un molester pa e trahadonan, segun Hubert Dirksz.