Cifranan di turismo di Venezuela ta sigui mustra e caida manera a bin ta pronostica cu lo dura un aña, caminda cu Venezuela ta cay cu tiki mas cu 50% den September 2016 compara cu 2015. E trend aki ta uno cu lo continua tambe den e lunanan nos dilanti, te cu rond April/Mei di 2017 y despues lo cuminsa mira un stabilidad den e cifranan aki.
Segun Minister di Turismo Otmar Oduber: Ta papia di cifranan cu ta mas o menos 15 – 20 mil turista menos den luna di September, esaki naturalmente tin impacto riba e totalidad di bishitante cu ta bin Aruba. Sinembargo, a pesar cu sa cu Venezuela ta un mercado cu lo fluctua a base di e desaroyonan socio politico den e Pais, toch Aruba ta mirando cifranan super fuerte pa loke ta trata otro mercadonan principal manera Merca cu ta sigui positivo, como tambe mercadonan Latino y Europeo.
Crecemento a pesar di caida Venezuela
“Ora exclui Venezuela for di e cifranan, ta mira cu a conoce un crecemento di 1.5% den cantidad di bishitante durante di e aña y pa September specificamente, casi 2.5% mas halto cu e tabata den 2015. Si compara esaki hunto cu e resultadonan di hotel cu ta mustra un crecemento den grado di ocupacion na luna di September cu casi 8% compara cu e aña anterior. Esaki naturalmente cu un RevPar di “double digit” esta 11% mas halto cu aña pasa y cu e prijs practicamente no mester a wordo reduci manera tabata e ultimo lunanan pa por logra esaki, cu menos di 1% di deviacion pa loke ta e prijs di cambernan e aña aki”.
Tur esaki ta mustra cu Aruba a pesar di e mercado Venezolano cu berdad ta mustra cu tin caida grandi den cantidad bishitante. Toch e cifranan di loke ta resultadonan di otro mercadonan principal como tambe hotelnan ta mustra di ta positivo. Pa loke ta trata crucero ta wak cu ta bay termina e aña positivo, 2016 e prome 9 lunanan ta indica crecemento di mas so menos 12 pa 13%. Kiermen cu ta bay termina e aña cu 8-9% di crecemento compara cu 2015. Tur cu tur, ora bo saca e factor di Venezuela for di e cifranan, bo ta mira cu e aña aki compara cu aña pasa ta bay ta practicamente mes bon cu aña pasa 2015 y pa 2017 lo cuminsa mira atrobe un crecemento den Venezuela despues cu e efecto pasa, Minister Oduber a conclui.