Ankara, TURKIA- Un hotel den oriente di Turkia a impone un prohibicion pa huespednan Hulandes y Aleman. Esaki segun un potret cu ta circula riba Twitter cu ta procedente di informenan di medionan di comunicacion Turco.
Na entrada di e hotel tin un poster pega cu un bandera Turco y texto: “Dutch And German Citizens Can Not Stay in This Hotel’ (Habitantenan di Hulanda y Alemania no por aloha den e hotel aki). Un bandera Aleman cu tabata colga riba e entrada di e hotel, a wordo retira door di e management di e hotel.
Motibo di e boycot ta e conflicto entre Alemania, Hulanda y Turkia. E dos paisnan Europeo tin un conflicto cu Turkia tocante e campaña pa referendum cu lo mester duna Presidente Erdogan mas poder. Despues cu un minister Turco a wordo prohibi na Hulanda, Erdogan a acusa Hulandesnan di “retasonan nazi” y a acusa Hulanda di a masacara miles di hombernan musulman na Srebrenica.
E prohibicion ta na vigor desde 14 di maart, un dia prome cu eleccionnan na Hulanda. No ta conoci si ainda Hulandesnan no ta wordo permiti pa keda na e hotel.