Durante e magno evento di Celebracion di Dia di Betico di Partido MEP diamars ultimo, e hala hubenil di MEP a wordo instala oficialmente.
HOT, Hubentud Orguyoso Talentoso a haci nan entrada riba stage bou musica di TBS brassband dunando e toke di entusiasmo y determinacion cu e hobennan di HOT tin pa mira un cambio grandi pa futuro.
Lider di MEP sra Evelyn Wever-Croes, a instala oficialmente e hala hubenil di partido den presencia di un publico bastante grandi. Den su discurso el a encurasha tur hoben pa forma parti activo den HOT y laga nan bos resona den e eleccion na september proximo pa hunto nos logra e cambio cu Aruba merece.
Un cantidad grandi di hobennan di Aruba a asisti na e yamada di HOT pa forma parti di e movemento unico aki. Un total di 300 hoben a registra y ta consciente y determina cu e rumbo di nos pais mester cambia. Y esaki nan lo bay demostra tambe pa medio di nan voto.
E hoben artista Maykxyon Maduro a dedica un cantica di inspiracion y ruego na Dios pa proteha nos isla y cada un cu ta biba aki y pa un cambio bin pronto riba nos pida baranca. HOT y MEP a reconoce Maykxyon pa su talento special.
Nos hobennan ta nos futuro! Ta p’esey mes Partido MEP a encarga hobennan talentoso y orguyoso di nan pais cu su hala hubenil. Esunnan cu ta forma parti di e directiva ta lo siguiente: Luis Luna, tesorero, DerlinaKock, secretaria, Xavier Maduro, Vice Presidente y Lyonel Dirksz, Presidente.
Partido MEP ta encurasha tur hoben pa forma parti di nos hala hubenil caminda bo por siña, experiencia y conoce hopi cos nobo durante un di e añanan di eleccion di MAS importante cu Aruba lo conoce!
Sigui HOT riba Snapchat: Hotmep297, Instagram: Hotmep, Twitter: hot_mep y tambe riba facebook HOT-MEP y keda al tanto riba tur e plannan y actividadnan di HOT pero tambe riba desaroyo politico na Aruba.
Pa mas informacion y si bo kier forma parti di miembresia di HOT, manda HOT un mensahe riba cualkier di nan plataforma social y nan lo atende bo.