Despues di Matthew y Nicole, ora tur hende a pensa cu temporada di horcan ta den caba, ata naturalesa ta duna un grupo di anciano un sorpresa inespera na Saliña Cerca, caminda papel muha mes ta corta bo! E grupo bakia di veterano nan bou guia di Jo Geerman, a kere cu nan lo bay pasa un “dagje uit” den vecindario di Saliña Cerca mescos cu temp’i nan tempo na plantage Tromp. Poco nan tabata sa cu nubianan scur tabata pak biniendo nan direccion…
Website di meteo y National Hurricane Center tabata mustra cu shelo ta kla, bunita, y cu “code green” pa bay suta na J & J Snack na Saliña Cerca, pero e implacabel Jossy “sluwe vos” Kelly tabata tin un escuadron di mercenario “gehuur” pa duna Jo y su pandilla un les cu lo drenta den bukinan di historia como “e massacre na saliña”! E antes flamante ekipo di Tecnicos La Moderna a dirti manera manteca den planchi ora e “sicario” nan di Jossy a pone presion riba nan! Prome wega tabata un bataya di “tocayo”, caminda Jo di J&J ta dal Jo di Tecnicos 2 – 1! Siguientemente e “undercover agent” Toto Gei ta duna otro veterano, Fein di Technicos, un capoti estilo “gouverneur”!
Di tres wega, Ozzy “The Wizard of Oz” di J&J ta dal Toribio cu su “toverstaf” lagando e paralisa cu 2-0, y den un frega di wowo e grandmaster Sheik Orman ta mustra Nilo caminda pa cas cu 2-1!!
Wel wel, shonnan, grawatamento di cabes pisa cerca Tecnicos La Moderna, kendenan ta atras cu 4 wega den no time! Technicos ta purba un milager, y ta manda Marcial bay corta bentaha, pero otro “pugilista” di J&J, Jorzinho Everon ta caba tur Marcial su illucion cu 2-1. Desde aki ta mane e macambanan ta bisa “bergafwaarts” pa Tecnicos La Moderna!! “Lucky Luke” Tromp ta dal Garrick 2-0; Johnny “Indiaanse Herder” ta dal Ronald 2-0; Alex “Bobcat” Eckmeyer ta suta Ronkos cu 2-0; Gutu ta “gut” Moonchi Erasmus y ta lag’e na moochi, y por ultimo Gorilla ta duna Juan un banana di dos capoti tras di otro pa clausura e pesadiya di Tecnicos cu broche de oro!!! J & J Snack ta gana cu cu’n grand slam di 10 – 0!!! Un CAPOTASO!!
Ni cuanto “google” den diccionario, nos no por haya un palabra adecua pa expresa e palisa, sota, slaaaa, cu Technicos a haya, y pesey nos ta mantene na “e massacre di saliña”. Despues cu e caravana di difunto a sali silenciosamente pa santana na Macuarima, den un entrevista exclusivo Jossy “sluwe vos” Kelly a djis bati ariba su pecho y declara “I’m the vos, the only boss!!!”