CENTRO AMERICA – Horcan Otto, cu ta asota desde diahuebs e frontera di Nicaragua y Costa Rica, a laga por lo menos 9 morto y mas di binto persona desapareci, mescos tambe a laga pueblonan inunda y dañonan severo. Na Costa Rica, e Gobierno a anuncia nuebe morto na Bagaces, un comunidad ubica na 96 kilometer nort di San Jose, e director di e Organismo di Investigacion Hudicial (OIJ), Walter Espinoza, den un conferencia di prensa hunto cu e presidente Luis Guillermo Solis y otro funcionarionan.
Aunke e Gobierno Costaricense no a precisa cifranan di desaparecido, fuentenan municipal y medionan di comunicacion ta menciona entre 20 y 25 persona, cual paraderonan ta desconoci despues di e paso di Otto, cu a aleha pa oceano Pacifico noordwest di Costa Rica, cu bientonan sosteni di 110 km/h, cu rafaganan mas fuerte, segun Centro Nacional di Horcan (NHC) di Merca, cu sede na Miami.
E Instituto Meteorologico Nacional a adverti cu Otto lo sigui afecta e pais, specificamente den Pacifico Central y Sur cu por soporta fuerte awasero diabierna.
En tanto, Solis a señala cu “lo decreta un duelo nacional di tres dia desde dialuna, ora cu a completa e labornan di buskeda y rescate.” Tambe el a gradici e ayudo di Panama y Honduras, cu a pone na disposicion varios avion pa colabora cu labornan di rescate y di asistencia na damnificadonan.
Fuente: RCN Noticias