KINGSTON, Jamaica – Horcan Matthew a debilita un tiki, mientras cu e ta moviendo pa Jamaica, pero ainda e tin biento te cu 230 km pa ora (145 miya pa ora), fuerte suficiente pa por distrui cas, pronosticadonan a bisa.
Awo aki e ta un tormenta di categoria 4, segun National Hurricane Center, despues cu mas tempran e tormenta a alcansa categoria cinco riba e escala di intensidad.
Gobierno ta den discusion di preparacionnan. E tormenta lo haci su yegada pa dialuna.
Ta spera cu e horcan lo alcansa e costa sur di Jamaica.
E capital, Kingston, ta situa den e area, como tambe e unico refineria di e pais.
Oficialnan a adverti cu bientonan fuerte tambe por afecta e areanan principal turistico di e isla, incluyendo Montego Bay den nort.
“Gobierno ta den un alerta,” segun director di comunicacion di e prome minister a bisa Reuters.
“Nos ta spera cu e horcan no dal nos, pero si e no alcansa nos, nos lo haci nos best pa sigura cu tur cos ta na su luga miho posibel,” Robert Morgan a bisa.
Mientras cu e tormenta ta yena, hopi Jamaiquino ta abasteciendo awa y cuminda.
Tropical Storm Warnings tambe a wordo saca pa e parti di costa di Colombia y Haiti durante e fin di siman.
Autoridadnan Haitiano a bisa cu e prioridad ta pa proteha e islanan zuid di e pais, cual habitantenan nan a describi di ta “prome den riesgo”, di acuerdo cu e agencia di noticia AFP.
Pronosticadornan a bisa cu mas of menos 38 cm di awasero por cay riba Jamaica y parti zuid di Haiti. Mientras cu Jamaica a wordo afecta pa Horcan Gilber na 1988, e ultimo tormenta grandi den e region tabata Horcan Sandy na 2012.
Matthew por ta e tormenta di mas poderoso pa alcansa e isla desde cu e registronan a cuminsa, meteorologo Eric Holthaus a bisa riba Twitter.
Fuente: BBC World