PORT-AU-PRINCE, Haiti – Despues di su awaseronan feros y biento den varios nacion di Caribe y di a laga un “desaster” zuid di Haiti, horcan Matthew ta sigui su marcha pa Merca, unda ya a declara alerta den varios estado y a cuminsa cu evacuacion.
Aunke e horcan a degrada mainta tempran diaranson di categoria 4 pa categoria 3, e ta sigui ta hopi peligroso.
Meteorologonan ta predici cu e horcan lo asota e costa oost, incluyendo Florida, Georgia, South y North Carolina, den algun momento entre e anochi di diahuebs y diasabra.
Centro Nacional di Horcan a bisa cu e tormenta por toca tera den cualkier di e estadonan. Di e mesun manera, el a señala cu e pronostico a largo plazo ta impreciso y ta adverti pa cada un di e areanan aki mester ta atento.
Declaratorianan di emergencia y evacuacion
Na principio di e siman aki gobernador di Florida, Rick Scott, a declara e estado di emergencia pa henter e estado.
El a adverti cu e impacto directo di Matthew por conduci na un “destruccion masivo” riba un nivel no bisto desde horcan Andrew, cu a devasta e area di Miami na 1992. Scott a conseha e residentenan di Florida cu ta biba cerca di costa oost, sali prome cu biahamento bira complica y a agrega ordennan di evacuacion por ta inminente.
E efectonan di e tormenta entrante ya por sinti den stacionnan di gasolin zuid di e estado. WSVN, afiliado di CNN a informa di e rijnan largo na stacionnan di gasolin na North Miami Beach.
Mientras cu na Georgia, gobernador Nathan Deal, a emiti un declaratorio di estado di emergencia den 13 condado di e costa.
Gobernadora di South Carolina, Nikki Haley, tambe a declara e estado di emergencia. Y na North Carolina, gobernador Pat McCrory a declara un estado di emergencia pa mas di mita di e 100 condadonan di e estado.
Autoridadnan den e condado di Hyde a emiti un orden di evacuacion obligatorio pa e isla di Ocracoke, un popular destino turistico. Bishitantenan por evacua desde 5’or di atardi diaranson y evacuacion di e residentenan lo cuminsa diahuebs.
Scol y oficinanan gubernamental den 25 condado lo ta cera diaranson. Algun di e scolnan lo funciona como refugionan temporal.
Desaster na Haiti
E poderoso tormenta a distrui cas, a benta matanan abao y a laga riunan desborda y ciudadnan inunda na Haiti, specialmente zuid di e pais, unda cu bientonan fuerte a castiga e nacion empobreci ora cu e wowo di horcan a crusa pa Cuba.
Por lo menos shete persona a fayece, inclui catro na Republica Dominicana y un na Sint Vincent y Grenadines. Funcionarionan tabata tin miedo di e cantidd eleva di morto na Haiti. “Ya nos a mira morto. Personanan cu tabata riba lama. Tin personanan desapareci. Hendenan cu no a respeta e alertanan. Bida a wordo perdi,” e presidente interino di Haiti, Jocelerme Privert a bisa den un rueda di prensa.
Ta spera cu e cantidad di herido aumenta, segun Josef Edgard Celestin, coordinador di comunicacion di servicio di proteccion civil di Haiti a bisa CNN.
Fuente: CNN en Español