Basta ta e reaccionnan cu a drenta pa loke ta trata e obheto misterioso cu a aparece den shelo di Bonaire Pasko anochi ultimo, cu a keda publica den algun medio di comunicacion di Aruba y Bonaire.Manera a priminti lo a duna mas atencion riba e suseso aki despues cu haña informacion for di Merca.

Pero nos kier repasa algun di e reaccionnan cu a drenta te cu awor.

Na Bonaire un persona a informa cu dia 25 di december ultimo pa 6:15 atardi el a mira e obheto aki pa un rato. E tabata saliendo di su cas na Kaya Papa Cornes na pia pa bishita un amigo y a nota algo straño den laira cu despues a disparse. E ta bisa cu e no a spanta y pensa cu kisas ta puro imaginacion te ora e articulo y foto a sali den Extra Bonaire. Tumando nota di e foto e persona aki a confirma cu loke el a mira ta similar.

Dia 2 di januari a drenta e prome reaccion for di Aruba cu ta bisa cu e portret ta un di e mihonan cu el a yega di wak y ta sugeri pa di un forma of otro trata na recupera e foto cu a keda saca riba un Blackberry cu den spanto a keda kitá. Tambe e lector a sugeri pa notifica un otro organisacion MUFON cu tambe ta haci investigacion riba e tereno aki, y ohala mas hende cuminsa habri nan wowo cu tur e cosnan cu nos ta considera como misterio. E lector a informa tambe cu si ta trata di photoshop mes, esaki ta un trabou sumamente profeshonal.

Otro reaccion cu a drenta di Aruba dia 3 di januari mainta ta di un señora cu hunto cu su yiu tambe a mira un obheto straño pero dia 22 di december pa mas o menos 9or di mainta. Nan tabata coriendo di Paradera pa Piedra Plat den un torencial awa sero y tempo tabata hopi scur. No obstante e situacion di awa e señora a wak algo straño den e seronan y ta lamenta cu como e tabata coriendo auto e no por a saca un potret di esaki. Den shock y den un silencio el a sigui core y tabata na altura di Drive Inn cu su yiu a dicidi di papia kico el a mira. Y esaki tabata exactamente loke e mama tambe a mira esta un obheto grandi den forma di un tayo color blanco cu un koepel riba dje. E señora aki ta informa cu aparentemente mas persona lo a wak esaki mesun dia y algun ta insisti cu por ta trata di un efecto di solo. Pero no tabatin solo, awa tabata yobe pisa y tabata scur. Ora e señora aki a tuma nota di e publicacion den corant el a sinti cu ta su obligacion di reporta loke nan tambe a mira y comparti nan experencia.

Mas lat otro lector di Aruba tambe ta reacciona y a manda nos un link pa splica cu no ta tur nave ta extra terestre, y cu na Merca tin hopi organisacion ta dedica nan mes na tipo di actividadnan asina pero no ta tur ta gosa di credibilidad confiabel. Tambe e lector aki ta aprecia cu a publica esaki pasobra a bira tempo pa concientisa pueblo di nos islanan cu nos no ta e unico sernan den e universo aki, y cu tin civilisacionnan cu ta existi pa miyones di aña caba cu ta hopi avansa mes riba tereno tecnologico. E ta considera informenan di obheto no identifica den universo como e storia mas grandi cu a keda scondi pa humanidad durante siglonan. E persona aki ta sigui splica cu for di edad hoben e tambe a nota hopi actividad den e espacio aereo di Aruba pero desafortunadamente nos pueblonan no ta cla ainda pa acepta esakinan como realidad pero a bira tempo pa concientisa nos hendenan.

Via telefon tambe nos a ricibi un reaccion di un señora latino cu ta biba na Oranjestad. E señora aki a informa cu ya tres luna pasa caba el a tuma nota di obhetonan straño den shelo di Aruba. Ora e papia esaki cu su conocinan, nan ta bis’e ta co’i loco. Tumando nota den corant di loke a pasa na Bonaire Pasco anochi, e señora ta reporta cu e tambe a wak e obheto aki Pasko anochi na Aruba pero pa mas o menos 9.40PM. Su siguiente dia di e la conta su colega y conocinan pero atrobe e ta haña e mesun reaccion cu ta cosnan imposibel y puro imaginacion. E señora aki a keda di manda un email despues cu mas detaye.

Telefonicamente tambe nos a ricibi mas reaccion for di Aruba cu ta bisa cu dia 30 di december un grupo di amigo a mira algo masha straño den shelo. Tabata pa mas o menos 6.30 atardi riba diadumingo cu 4 amigo a nota un obheto misterioso masha halto biniendo for di Nortwest pa Zuid. Na cierto momento e obheto aki a keda para un caminda y despues di algun seconde a sigui su rumbo. Segun informacion no por ta trata di un avion pasobra avion no por ‘freeze’ den laira y na e altura ei no ta kere cu un helicopter por bula tampoco. E opheto tabata mustra di ta algo plat y no parse un avion. E mesun persona aki a reporta ku na 2011 tambe nan a mira cosnan straño den shelo cu despues a baha y keda flota riba laman Zuid di e refineria Valero y despues a move rapido den direccion di Venezuela. E persona aki su siguiente dia a subi algun website di Venezuela y a lesa cu nan tambe a mira un luz misterioso den laira na altura di nan costa e dia anterior. Aparentemente na Aruba tin mas hende ta nota cosnan inexplicabel pero pa sea miedo of kisas ignorancia ta keda sin papia di esakinan.

Reakshon di UFCOCasebook: Entre tanto UFOcasebook.com na Merca a publica e potretnan saca na Bonaire riba su website diahuebs ultimo, pero manera e webmaster a adverti nos, cu e reaccion di nan lectornan sigur lo ta negativo pa desbarata of ridiculisa e potretnan y e storia. El a informa cu e tipo di nave parse un prototipo Lazar di Area 51 y a manda un imheen di esaki pa nos. Pero e prototipo Lazar ta sera parti abou y esun riba e potret ta habri parti abou y ta mustra algo manera dos luz of kisas vapor of stoom blanko. Cu otro palabra e bishitantenan cu a subi ta considera e foto komo ‘fake’ of ’hoax’ cu ta nifica un intencion pa gaña hende. Un dje reaccionnan ta bisa cu ta trata di otro ‘Apps’ di awendia pa pone un obheto riba foto den telefon pa gaña of spanta hende. Otro reaccion ta bisa cu e imahen ta mucho statico y hopi limpi y cu e informacion no ta cuadra cu otro. Otro reaccion ta bisa cu e refleccion di luz riba e nave no ta cuadra cu e orario cu esaki a keda saca. Un otro ta bisa cu ora cu haci e imahen mas grandi den fondo caminda e nave ta, e no ta igual cu e shelo.

For di Kòrsou tambe a drenta serka Extra un reaccion di un lector cu ta lamenta cu e tin mala suerte cu e UFO a lag’é sali di Bonaire pa e aparece eynan. E persona  aki a informa cu semper e tin interes den tur loke ta storia di UFO y mesora a analisa e potretnan manera ta su custumber di haci. Na su opinion e calidad di e fotonan ta laga di desea si nan ta saca cu un Iphone. E ta opina cu apesar cu esun cu a saka e foto tabata spanta toch Luna y Jupiter tabatin e atencion. E ta sigui opina cu den un caso asina lo bo a scohe pa filma of pa consentra riba e nave y zoom riba esaki pa haña un miho imahen. E persona aki tambe ta considera e foto como un joke di Iphone y UFO Camera cu awendia ta existi y cu por keda cumpra riba Internet y asta a duna e link di itunes.apple.com/nl/app/ufo-camera pa averigua.  Tuma Nota: E autor di e fotonan kier a saca e alineacion di Luna y Jupiter y ta descubri e nave ora nan a bai wak e foto. Pues no ta e nave nan a wak pa saca.  Nos a tende di e link ariba menciona y a subi dia 30 di december riba dje y tambe riba dos otro link mas pa wak si e navenan cu Itunes ta ofrece ta similar, pero ningun ta mescos cu esun riba e foto. Ademas eroneamente nos a scirbi den e articulo publica cu ta un Iphone a usa pero esaki ta un Smartphone Samsung Galaxy cu ta ilustra claramente den properties, dia ora, tipo di telefon y camara, pixels y asta e posishon GPS.

Con cu mir’é, pensamentonan ta keda pa cada persona. Nos ta respeta nan opinion y tambe opinion di tur hende cu reacciona. Ainda mester drenta mas resultado y esun mas importante pa nos ta, si acaso e nave riba e foto ta ‘fake’, mester investiga ki mishi e obheto den e telefon Samsung Galaxy si nunca e doño a ‘download’ nada, ni tampoco tin idea con ta photoshop algo, y sigur no den un calidad asina halto.  Manera algun persona ta opina, nunca un presidente di un pais lo tribi papia, acepta of desmenti cu nos no ta nos so riba e mundo aki, pasobra nan lo califik’é mesora como loco. Mientras tanto nos siguiente paso ta pa laga un experto check e telefon cu a saca e fotonan. Pasobra mester soluciona e misterio di unda e imahen a sali, y ora esaki ta conoci nos lo informa di esaki. Adhunto un imahen di e prototipo Lazar di Area 51 manera un hende na Merca lo a sake basta aña pasa. Talbes esaki tambe ta fake?

Pa reaccion tuma contacto cu Byron Tromp na Email: Byrontee2002@yahoo.com of telefoon +599 7850333 / +599 7867867 (redacta pa: Byron Tromp)